Ամփոփվեցին Դպրոցականների հանրապետական աստղագիտական օլիմպիադայի արդյունքները
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Երևանի Ա. Շահինյանի անվ. ֆիզ.-մաթ. հատուկ դպրոցում (ՖՄԴ) ամփոփվեց դպրոցականների աստղագիտական օլիմպիադայի եզրափակիչ փուլը: Ինչպես հաղորդում է «Արմենպրես»-ը, վկայակոչելով Հայկական աստղագիտական ընկերությունը, օլիմպիադային մասնակցում էր 15 աշակերտ:
Օլիմպիադային առաջադրված էր 5 խնդիր` երկնային մեխանիկայից, աստղաչափությունից, աստղադինամիկայից և ճառագայթման տեսությունից: Լավագույն արդյունքներ ցույց տվեցին ՖՄԴ և «Քվանտ» վարժարանի սաները:
Առաջին կարգի դիպլոմի է արժանացել Հրանտ Թոփչյանը (ՖՄԴ), երկրորդ կարգի` Էդգար Վարդանյանը (ՖՄԴ), երրորդ կարգի` Էդվարդ Խալաֆյանը («Քվանտ»), Միքայել Մկրտչյանը (ՖՄԴ), Աշոտ Մաթևոսյանը («Քվանտ») և Աշոտ Մովսիսյանը (ՖՄԴ):
Օլիմպիադան միաժամանակ ընտրական փուլ էր Աստղագիտության միջազգային օլիմպիադայի համար, որն այս տարի աշնանը կկայանա Բուլղարիայում:
Հայ պատանիները գերազանց ավանդույթներ ունեն միջազգային օլիմպիադաներում, ովքեր, ընդհանուր առմամբ, նվաճել են 9 ոսկե, 5 արծաթե և 19 բրոնզե մեդալ, և թիմային հաշվարկով հանդիսանում են լավագույն հավաքականներից մեկը օլիմպիադաների 19-ամյա պատմության ընթացքում:
Ժյուրիի նախագահն էր Բյուրականի աստղադիտարանի ավագ գիտաշխատող, ֆիզ.-մաթ. գիտ. թեկնածու Աշոտ Հակոբյանը, իսկ մյուս անդամներն էին Ավետիկ Գրիգորյանը, Մարիետա Գյուլզադյանը, Էմիլիա Կարապետյանը, Արեգ Միքայելյանը, Տիգրան Նազարյանը և Սերգեյ Ներսիսյանը:
Բաժանորդագրվեք մեր ալիքին Telegram-ում