Գյումրու և Վանաձորի պետական դրամատիկական թատրոնները և «Հորովել» անսամբլը հանդես կգան համատեղ ծրագրով
ԳՅՈՒՄՐԻ, 31 ՄԱՐՏԻ, ԱՐՄԵՆՊՐԵՍ: ՀՀ մշակույթի նախարարության և Վանաձորի քաղաքապետարանի աջակցությամբ, Գյումրու Վարդան Աճեմյանի և Վանաձորի Հովհաննես Աբելյանի անվան պետական դրամատիկական թատրոնները և Վանաձորի «Հորովել» երգի-պարի անսամբլը հանդես կգան համտեղ ծրագրով: Համերգ-ներկայացումը տեղի կունենա մայիսի 17-ին, Վանաձորի Շառլ Ազնավուրի անվան մշակույթի պալատում: Թատերականացված համերգ–ներկայացման բեմադրիչներն են Գյումրու դրամատիկական թատրոնի գլխավոր ռեժիսոր Լյուդվիգ Հարությունյանն ու ՀՀ վաստակավոր արտիստ Հովհաննես Հովհաննիսյանը, բեմանկարչությունը՝ Լուսինե Խաչատրյանի:
Շուրջ 60 տարվա ստեղծագործական տարեգրություն ունեցող Վանաձորի «Հորովել» երգի-պարի պետական անսամբլը, հանրապետության այն եզակի անսամբլներից է, որը փորձում է պահպանել ու շարունակել իրական ազգային արժեքների տարածումը: Անսամբլի գեղարվեստական ղեկավարն է Արմեն Ներսիսյանը, բալետմայստերը` Արայիկ Գևորգյանը, գործիքային մասի ղեկավարը` Էլմիրա Կռոյանը:
«Առաջին անգամ «Հորովել»-ի համերգին ներկա լինելուց հետո, զգացինք, թե ստեղծագործական ինչ մեծ ներուժ ունեցող կոլեկտիվ է, որի հետ կարելի է հետաքրքիր նախաձեռնություններով հանդես գալ, իսկ Գյումրու դրամատիկական թատրոնը միշտ համագործակցության ու նորարարությունների համար բաց է: Ցանկություն հայտնեցինք համատեղ համերգ-ներկայացմամբ հանդես գալու և, քանի որ Վանաձարում է նաև մեր լավ բարեկամը՝ Վանաձորի պետական դրամատիկական թատրոնը, խնդրեցինք թատրոնի գեղարվեստական ղեկավարին՝ Վահե Շահվերդյանին, որպեսզի իրենց թատրոնն էլ միանա: Այսպիսով, սա եղավ երկու թատրոնների և մեկ անսամբլի համատեղ համերգ-ներկայացում: Շատ կարևոր է այսօր խոսել ազգապահպանության մասին: Այս համատարած գլոբալացման ու անճաշակության մեջ կարևոր է պահել հայի դեմքը, չկորցնել հայի տեսակը, իսկ այս համերգ-ներկայացումը ազգապահպանության ևս մեկ կոչ է:Կարծում եմ, համերգ-ներկայացումից հետո հանդիսատեսը մտորելու բան կունենա: Սա զվարճանք կամ հերթական ներկայացումն ու համերգը չէ, այլ խրատական պատմություն է ազգապահպանության մասին: Ուրախ եմ, որ հանրապետության լավագույն երգի-պարի անսամբլներից մեկի հետ նմանատիպ ծրագիր ենք իրականացնում, ուրախ եմ նաև այն բաց ու պատրաստակամ վերաբերմունքի համար, որ նորարարության համար ցույց տվեց այս անսամբլը: Իսկ Վանաձորի թատրոնն, ունենալով ստեղծագործական մեծ ներուժ, ունի ավելի մեծ ճանաչման կարիք: Ի ուրախություն բոլորիս, այս նախագիծը կարևորվեց, հաստատվեց և աջակցություն ստացավ ՀՀ մշակույթի նախարարության կողմից»,- «Արմենպրես»-ին տեղեկացրեց Գյումրու դրամատիկական թատրոնի պրոդյուսեր Տիգրան Վիրաբյանը՝ իր հիացմունքը չթաքցնելով նաև Վանաձորի քաղաքապետարանի հանդեպ՝ ի դեմս քաղաքապետի և այն պատրաստակամ վերաբերմունքի, որը ցուցաբերում է Վանաձորի քաղաքապետարանի մշակույթի բաժնի պետ Գոռ Բադյանը:
Հիմա երկու թատրոնները զուգահեռ իրականացնում են փորձեր, իսկ ապրիլից ողջ կոլեկտիվը կմիանա և կսկսվի համատեղ փորձերի ընթացքը: «Սա նաև թատրոնների համետեղ նախագծի լավ փորձարարական գաղափար է: Գյումրու դրամտիկական թատրոնը միշտ բաց ու պատրաստակամ է այս առումով: Նման համագործակցությունը նոր շունչ է տալիս թատրոնին»,- նշեց Տիգրան Վիրաբյանը՝ հույս հայտնելով, որ չնայած որոշ տեխնիկական դժվարություններին, հանդիսատեսը կտեսնի նոր շունչ ու մշակութային իրական արժեք:
Համերգ-ներկայացման վանաձորյան պրեմիերայից հետո նույն ծրագիրը կբեմադրվի ԼՂՀ-ում` Ստեփանակերտում« իսկ սեպտեմբերին` Գյումրիում:
Արմենուհի Մխոյան
Բաժանորդագրվեք մեր ալիքին Telegram-ում