ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Քուվեյթը 500 միլիոն դոլար կհատկացնի սիրիացի փախստականներին: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այս մասին մարտի 31-ին Քուվեյթի մայրաքաղաքում ընթացող դոնոր երկրների ներկյացուցիչների հանդիպման ժամանակ նշել է Քուվեյթի Էմիր շեյխ Սաբահ ալ Ահմադ ալ Ջաբիր աս Սաբահը: Նա հայտարարել է, որ գումարը կտրամադրվի բարեկամ Սիրիայի ժողովրդին՝ որպես օգնություն:

Նախորդ տարվա ընթացքում Քուվեյթը ևս 500 միլիոն դոլար, իսկ 2013թ.-ին՝ 300 միլիոն դոլար էր հատկացրել սիրիացի փախստականներին:

Համաժողովին մասնակցում են 78 երկրների և ավելի քան 40 միջազգային կազմակերպությունների ներկայացուցիչներ:

Սիրիական հակամարտության չորս տարիների ընթացքում բախումների զոհ է դարձել 220 հազարից ավելի մարդ, միլիոնավոր սիրիացիներ գաղթական են դարձել իրենց երկրի ներսում և հարևան երկրներում: