ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Երևանի թատրոնի և կինոյի պետական ինստիտուտում տոնական եռուզեռ էր...բուհում նշում էին Թատրոնի միջազգային օրը: Մարտի 27-ին կրթական հաստատությունում անցկացվեցին մի շարք տոնական միջոցառումներ, որոնց մասնակցեց Երևանի քաղաքապետ Տարոն Մարգարյանը: 

Թատրոնի միջազգային օրվա կապակցությամբ բացվեց ինստիտուտի առաջին ռեկտոր Վավիկ Վարդանյանի հուշաքարը, ինչպես նաև անցկացվեց ուսանողական ուրախ և գունագեղ հանդիսություն, որի ընթացքում բուհի ուսանողները ցուցադրեցին իրենց տաղանդը:

ԵԹԿՊԻ ռեկտոր Դավիթ Մուրադյանը նշեց, որ բեմը միշտ 50-60 սանտիմետր բարձր է լինում. նշանակում է, որ թատրոնն ավելին է, քան իրականությունը:

«Բարձր խոսքի, հայացքի, զգացումների, նպատակների, երազանքների տեղ է թատրոնը: Մեզ իր ներկայությամբ պատվել է Երևանի քաղաքապետ Տարոն Մարգարյանը, ով մեծ աջակցություն է ցուցաբերել մեր կրթօջախին: Յուրաքանչյուր տարի մարտի 27-ին նա մեծ պատիվների է արժանացնում թատերական աշխարհի և թատրոնների մարդկանց: Մեր ինստիտուտի երկու ներկայացուցիչներ` Ռուբեն Մարուխյանը և Վարուժան Ավանեսյանը, թատրոնի միջազգային օրվա կապակցությամբ պարգևներ ստացան Երևանի քաղաքապետից»,- «Արմենպրես»-ի փոխանցմամբ՝ նշեց Դավիթ Մուրադյանը՝ շնորհակալություն հայտնելով քաղաքապետին և շնորհավորելով իր գործընկերներին:

Մուրադյանը Երևանի քաղաքապետին հանձնեց ԵԹԿՊԻ մեդալը: «Շնորհավորում եմ բոլորիդ և վստահեցնում, որ միշտ ձեր կողքին ենք. քաղաքապետարանի բոլոր լիազորությունները պատրաստ ենք օգտագործել ինստիտուտի և ուսանողների համար: Շնորհակալ եմ այս պարգևի համար»,- դիմելով ներկաներին՝ ընդգծեց Երևանի քաղաքապետ Տարոն Մարգարյանը:

Տոնական հանդիսության ընթացքում ԵԹԿՊԻ ուսանողները շնորհավորեցին նաև իրենց սիրելի դասախոս, թատերական գործիչ Նիկոլայ Ծատուրյանի ծննդյան 70-ամյակը:

Բեմում հայտնվեց մոմերով տորթ, և Ծատուրյանն իր կուրսի ուսանողների մասնակցությամբ փչելով մարեց տորթի մոմերը: Ծատուրյանը պարգևատրվեց ԵԹԿՊԻ պատվո մեդալով, որը շնորհվում է բուհի պատվավոր շրջանավարտներին:

«1962 թվականից ես այստեղ եմ, 1973 թվականից դասավանդում եմ: Ոչ միայն մենք ենք սովորեցնում երիտասարդներին, այլև մենք ենք սովորում նրանցից»,- նկատեց Նիկոլայ Ծատուրյանը:

«Թատրոն» բառն առաջացել է հին հունական «theatron» բառից, որը թարգմանաբար նշանակում է «տեղ, որտեղ նայում են»: Թատրոնի միջազգային օրն առաջին անգամ նշվել է Ֆրանսիայում, հետո տոնը տարածվել է ողջ աշխարհում: Օրվա կապակցությամբ առաջին ուղերձը գրել է ֆրանսիացի գրող և նկարիչ Ժան Կոկտոն 1962 թվականին:

Տարոն Մարգարյան, Ռաֆաել Քոթանջյան. Երվանդ Ղազանչյան, Դավիթ Մուրադյան Տարոն Մարգարյան, Արամ Սուքիասյան, Դավիթ Մուրադյան Տարոն Մարգարյան, Արամ Սուքիասյան, Դավիթ Մուրադյան

Թատրոնի միջազգային օրվա կապակցությամբ ԵԹԿՊԻ առաջին ռեկտոր Վավիկ Վարդանյանի հուշաքարի բացման արարողությունը: Լուսանկարները` Ֆելիքս Առուստամյանի