ԳԱՎԱՌ, 27 ՄԱՐՏԻ, ԱՐՄԵՆՊՐԵՍ: Գեղարքունիքի մարզի Վաղաշեն գյուղում կառուցվում է Հայոց ցեղասպանության ժամանակ եւ անցած դարում տեղի ունեցած հայկական տարբեր հերոսամարտերում իրենց կյանքը հայրենիքի համար զոհած հայորդիներին նվիրված հուշահամալիր:

Ինչպես «Արմենպրես»-ին տեղեկացրեց Վաղաշենի գյուղապետ Արթուր Սուվարյանը, գյուղի նորակառույց Սուրբ Գրիգոր Նարեկացի եկեղեցու բակում վեր բարձրացող հուշահամալիրում տեղադրվելու է 6 հուշաքար, կենտրոնում՝ մեկ խաչքար: Հուշաքարերը նվիրվում են 1915 թվականի Հայոց եղեռնի, Սումգայիթյան եղեռնի, Սպիտակի 1988 թվականի երկրաշարժի, Սարդարապատի եւ Արցախի հերոսամարտերում, Հարենական մեծ պատերազմում զոհված հայորդիների հիշատակին:

Հուշահամալիրի կառուցման համար կծախսվի մոտ 30 միլիոն դրամ: Հուշահամալիրի ճարտարապետը Նունե Պետրոսյանն է: «Գումարի մի մասը կներդրվի տեղական բյուջեից, մի մասը՝ բարերարների օժանդակությամբ: Թեեւ չի բացառվում, որ ի հայտ գան նոր բարերարներ, եւ տեղական բյուջեի միջոցներն ազատվեն նման հոգսից: Կաշխատենք մինչեւ ապրիլի 24-ը ավարտել հուշահամալիրի կառուցումը: Եթե հայոց ցեղասպանության մեկդարյա տարելիցին չհասցրինք, առջեւում արդեն Մեծ հայրենականում տարած հաղթանակի կամ Սարդարապատի հերոսամարտի տարեդարձերի տոներն են, որոնք էլ կնշանավորվեն այդ հուշահամալիրի բացմամբ: Սերունդները պետք է հիշեն ու խոնարհվեն մեր սուրբ նահատակների հիշատակի առաջ, նաեւ նրանցով իրենց մեջ կրեն հայրենասիրական ոգին, անդուլ պայքարով պաշտպանեն ու կառուցեն մեր երազների Հայաստանը»,-նշեց Արթուր Սուվարյանը:

Խոսրով Խլղաթյան