Կանադայի խորհրդարանում կներկայացվի ապրիլը որպես ցեղասպանությունների հիշատակման ամիս հռչակելու բանաձևը
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Կանադայի խորհրդարանի անդամ, Կանադա-Հայաստան խորհրդարանական բարեկամության խմբակցության փոխնախագահ Բրեթ Բութը հրապարակել է խորհրդարանի առաջիկա նիստում ներկայացվելիք 587 բանաձևը, որը նպատակ ունի ապրիլը Կանադայում հռչակել ցեղասպանությունների հիշատակման, դատապարտման և կանխարգելման ամիս: Ինչպես հաղորդում է «Արմենպրես»-ը, այս մասին տեղեկացնում է «Հորիզոն» շաբաթաթերթը:
Կանադայի հայ դատի հանձնախումբը կոչ է արել ցեղասպանությունների խնդրով անհանգստացող բոլոր կանադացինրին իրենց ձայնը լսելի դարձնել և պառլամենտի անդամներին կոչ անել քվեարկել բանաձևի օգտին:
Կանադայի Հայ դատի հանձնախմբի նախագահ Ժիրայր Բասմաջյանը նշել է, որ այս բանաձևը վերահաստատում է Կանադայի հանձնառությունը ցեղասպանությունների կանխարգելման հարցում և ընդունում է այն փաստը, որ կանխարգելման առաջին քայլը անցյալում կատարված ցեղասպանությունները հիշելն ու դատապարտելն է: «Մենք երախտապարտ ենք, որ այս բանաձևում ապրիլի 24-ը հիշատակվում է որպես Հայոց ցեղասպանության հիշատակման օր, հետևաբար բոլոր կանադացիները կարող են միանալ հայ համայնքին` աշխատելու ապագա ցեասպանությունները կանխարգելելու ուղղությամբ, ինչը հատկապես կարևոր է ներկայում Իրաքում և Սիրիայում փոքրամասնությունների նկատմամբ կրոնական և էթնիկ շարժառիթներով տեղի ունեցող բռնությունների ֆոնի ներքո»,- նշել է Բասմաջյանը:
Բրեթ Բութի ներկայացրած բանաձևի հաստատմամբ Կանադայի Ներկայացուցիչների պալատը պետք է վերահաստատի.
- Հոլոքոստի հիշատակման օրվա հռչակագիրը` ընդունված 2003 թվականի նոյեմբերի 7-ին,
- Հայոց ցեղասպանության ճանաչման բանաձևը` ընդունված 2004 թվականի ապրիլի 21-ին,
- Ռուանդայի ցեղասպանության բանաձևը` ընդունված 2008 թվականի ապրիլի 7-ին,
- Ուկրաինայի սովասպանության (Հոլոդոմոր) հիշատակի օրը` ընդունված 2008 թվականի մայիսի 29-ին:
Ներկայացուցիչների պալատը Կանադայի կառավարությանը կոչ է անում` հարգել բոլոր ցեղասպանությունների զոհերի հիշատակը, ճանաչել ապրիլը որպես Ցեղասպանության հիշատակման, դատապարտման և կանխարգլման ամիս: Բանաձևով Կանադայի ներկայացուցիչների պալատը հիշատակի օրեր պետք է ճանաչի.
- Ապրիլի 7-ը` որպես Ռուանդայի Ցեղասպանության հիշատակի օր,
- Ապրիլի 24-ը` որպես Հայոց ցեղասպանության հիշատակի օր,
- Հրեական լուսնային օրացույցի համաձայն ճշտված օրը` որպես Հոլոքոստի հիշատակի օր,
- Նոյեմբերի չորրորդ շաբաթը` որպես ուկրաինական սովասպանության օր:
Բաժանորդագրվեք մեր ալիքին Telegram-ում