Մեկնարկում է Մանկապատանեկան գրքի և երաժշտության շաբաթը
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Երևանում 2015 թվականի մարտի 26-ից ապրիլի 2-ը անցկացվվում է Մանկապատանեկան գրքի և երաժշտության շաբաթը: Մշակութային ծրագրի նպատակն է նպաստել երեխաների և պատանիների շրջանում գրքի նկատմամբ հետաքրքրության առաջացմանն ու մանկապատանեկան ընթերցանության խթանմանը, մանուկների ու պատանիների համար ստեղծված երաժշտական ստեղծագործությունների հանրայնացմանը: Շաբաթի ամենամյա կազմակերպումն ակնկալում է մանուկների և պատանիների շրջանում գրքի, ընթերցանության նկատմամբ հետաքրքրության և մանկապատանեկան գիրք-ընթերցող կապի ամրապնդում: Թիրախային խմբերն են` մանուկները, պատանիները, մանուկների համար ստեղծագործող արվեստագետները և մանկապատանեկան գրքի ու երաժշտության ոլորտների աշխատակիցները:
Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, ավանդաբար անցկացվող շաբաթի բացումը տեղի կունենա մարտի 26-ին Խնկո Ապոր անվան ազգային մանկական գրադարանում: Գրադարանի նկարչական ստուդիայի սաների աշխատանքների ցուցադրությամբ կազդարարվի Գրքի շաբաթի մեկնարկը: Մինչև ապրիլի 2-ը շարունակվող Մանկապատանեկան գրքի և երաժշտության շաբաթվա միջոցառումների շրջանակում գրադարանում կանցկացվեն ցերեկույթներ, գրքերի շնորհանդեսներ և քննարկումներ, երաժշտական կոլեկտիվ ունկնդրումներ, վիտորինաներ, մրցույթներ և այլ միջոցառումներ: Իսկ փակման օրը՝ ապրիլի 2-ին, Հայաստանի գրողների միության դահլիճում տեղի կունենա մանկագիր Երվանդ Պետրոսյանի ծննդյան 75-ամյակին նվիրված հանդիսություն:
Մանկապատանեկան գրքի և երաժշտության շաբաթին իրենց առանձին ծրագրերով կմասնակցեն նաև հանրապետության մի շարք գրադարաններ:
Բաժանորդագրվեք մեր ալիքին Telegram-ում