Լիբիական բանակը 3 օրով դադարեցրել է օդային հարվածները
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: Լիբիական բանակը միակողմանիորեն, երեք օրով դադարեցրել է բոլոր օդային հարվածները: Ինչպես հաղորդում է «Արմենպրես»-ը՝ վկայակոչելով միջազգային լրատվամիջոցները, նման որոշում ընդունել են լիբիական իշխանությունները` ՄԱԿ-ի ներկայացուցիչներին երկխոսություն վարելու հնարավորություն տալու համար: Հայտարարությունը հնչել է մի քանի ժամ անց այն բանից հետո, երբ լիբիական օդային ուժերը հերթական հարվածներն են հասցրել Տրիպոլի քաղաքի Միտիգա օդանավակայանի մերձակայքում գտնվող ռազմական բազային: Օդանավակայանն այժմ իսլամիստների հսկողության տակ է: Հարվածների հետևանքով զոհեր և վիրավորներ են գրանցվել, որոնց թիվը դեռ չի հրապարակվել:
Մարտի 5-ին Մարոկկոյում կմեկնարկի ՄԱԿ-ի աջակցությամբ իրականացվող երկխոսության հերթական փուլը: Բանակցությունների ընթացքում կքննարկվեն Լիբիան ճգնաժամից դուրս բերելու ուղիները: Փորձագետների կարծիքով` համաձայնության գալու հնարավորությունները շատ փոքր են:
2011թ.-ին Լիբիայի նախկին ղեկավար Մուամմար Քադաֆիի իշխանության տապալումից հետո Լիբիան շարունակում է մնալ քաոսային վիճակում:
Բաժանորդագրվեք մեր ալիքին Telegram-ում