Ճամբարակ քաղաքը արարողությունների սրահի խիստ կարիք ունի
ԳԱՎԱՌ, 3 ՄԱՐՏԻ, ԱՐՄԵՆՊՐԵՍ: Ճամբարակ քաղաքի բնակիչները քաղաքի եւ մարզի իշխանությունների առջեւ բարձրացրել են արարողությունների սրահ ունենալու խնդիրը:
Ինչպես «Արմենպրես»-ին տեղեկացրեց Ճամբարակի քաղաքապետ Յուրա Ավալյանը, քաղաքի բնակչությունը դրա կարիքն զգում է հատկապես հոգեհացի արարողությունների ժամանակ: Մարդիկ նաեւ ուզում են հարսանյաց, բանակ ճանապարհելու, այլ ուրախ արարողությունների համար սրահ ունենալ, սակայն քաղաքապետարանի միջոցները չեն բավարարում հարցին լուծում տալու համար:»Հոգեհացի ժամանակ, որը տրվում է մարդկանց տներում, մինչեւ հինգ հարյուր եւ ավել մարդ են հավաքվում, որը դժվարություններ է ստեղծում հանգուցյալի ընտանիքի համար: Բացի այդ, հարսանյաց եւ այլ ուրախ արարողությունների համար մարդիկ ստիպված են լինում սրահներ վարձակալել Սեւանում կամ Երեւանում` լրացուցիչ, նույնիսկ շռայլ ծախսեր անելով: Նրանց վիճակն, իրոք, կթեթեւանա, եթե կարողանանք լուծել արարողությունների սրահի խնդիրը:Հիմքից նոր շենքի կառուցումը թանկ կնստի մեզ վրա, քան` նոր շենքային տարածքի գնումը, ինչի համար եւ խնդրել ենք ՀՀ կառավարության օժանդակությունը: Քաղաքում կա անհատական սեփականություն հանդիսացող հարմարավետ շենք, որը ձեռք բերելու դեպքում կկարողանանք լուծել խնդիրը` այն ծառայեցնելով բազմաբնույթ արարողությունների անցկացմանը, ինչպես նաեւ երիտասարդների կամ տարեցների ժամանցի կազմակերպմանը»,-նշեց քաղաքապետը: Հարցը ներկայացվել է նաեւ Գեղարքունիքի մարզպետ Ռաֆիկ Գրիգորյանի ուշադրությանը:
Խոսրով Խլղաթյան
Բաժանորդագրվեք մեր ալիքին Telegram-ում