Հայ հրաձիգները կմասնակցեն Եվրոպայի առաջնությանը
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Նիդեռլանդների Առնեմ քաղաքում մարտի 2-8-ը տեղի կունենա հրաձգության Եվրոպայի առաջնությունը` 10մ հեռավորությունից՝ հրացան, ատրճանակ, վազող թիրախ զենքաձևերից: Հայ մարզիկները կմասնակցեն հավաքական թիմի գլխավոր մարզիչ Սեյրան Նիկողոսյանի և ավագ մարզիչ Անդրանիկ Այվազյանի ղեկավարությամբ: Եվրոպայի առաջնությանը կմասնակցեն 43 երկրի 521 մարզիկ, որոնցից 11-ը` Հայաստանից:
Հայաստանը նման մեծ կազմով անկախությունից հետո մասնակցել է 2013թ. Դանիայում կայացած Եվրոպայի առաջնությանը, թիմի կազմը հիմնականում մնացել է նույնը, սակայն փոխվել են որակական հատկանիշները: Հայաստանի հավաքականը կազմված է Երևանի հրաձգության մանկապատանեկան մարզադպրոցի և Հրաձգության հանրապետական մարզադպրոցի սաներից: Երիտասարդ Հրաչիկ Բաբայանը մրցմանը կմասնակցի մեծահասակների պայքարում՝ նախապատրաստվելու համար Բաքվում կայանալիք Եվրոպական խաղերին:
«Արմենպրես»-ի հաղորդմամբ, այս մասին տեղեկացնում է հրաձգության Հայաստանի ֆեդերացիան: Թիմում նորեկ է տակավին պատանի 12-ամյա Հայկ Բաբայանը՝ Հրաչիկ Բաբայանի կրտսեր եղբայրը: Եվրոպայի առաջնությունը նրա երկրոդ արտագնա ստուգատեսն է: Մարզիկներից յուրաքանչյուրը կմասնակցի մեկ վարժության, իսկ վազող թիրախ ձևի մարզիկները կմասնակցեն երկու՝ խառը և նորմալ վազք մրցաձևերին: Մարտի 3-ին տեղի կունենան բացման արարողությունը և որոշ պաշտոնական արարողություններ, իսկ հաջորդ օրը կմեկնարկեն մրցելույթները: Առաջին օրը կմրցեն Լիլիթ Մկրտչյանը, Ռազմիկ Մինասյանը, Շանթ Սարգսյանը, Արթուր Պետրոսյանը, Զավեն Իգիթյանն ու Մարիամ Միքայելյանը:
Բաժանորդագրվեք մեր ալիքին Telegram-ում