Պեսկովը նշել Է Եվրոպայից եւ ԱՄՆ-ից գյուղատնտեսական արտադրանքի ներկրման պայմանը
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Ռուսաստանը կարող Է թույլատրել Եվրոպայից եւ ԱՄՆ-ից գյուղատնտեսական հումքի ներկրումը պայմանով, որ արեւմտյան ընկերությունները ներդրումներ կատարեն ՌԴ-ում դրա վերամշակման կարողությունների կառուցման բնագավառում: Այս մասին, ինչպես տեղեկացնում Է «Արմենպրես»-ը, հայտարարել Է Ռուսաստանի նախագահի մամուլի քարտուղար Դմիտրի Պեսկովը մարտի 2-ին «Իզվեստիա» թերթում հրապարակված հարցազրույցում:
Պեսկովը, մեկնաբանելով Ռուսաստան գյուղատնտեսական արտադրանքի ներկրում թույլատրելու Հունաստանի խնդրանքը, հիշեցրել Է, որ Ռուսաստանն Առեւտրի համաշխարհային կազմակերպության անդամ Է եւ չի կարող ընտրողաբար վերացնել պատժամիջոցները Եվրամիության երկրներից մեկի համար: «Տվյալ դեպքում կարելի կլիներ մշակել ոչ թե ուղղակի մատակարարումների, այլ այստեղ՝ Ռուսաստանի տարածքում սննդի վերամշակման ձեռնարկությունների ստեղծման բնագավառում ներդրումների դեպքում պատվիրվող հումքի մատակարարումների սխեմա»,- նշել Է նախագահի մամուլի քարտուղարը:
Ավելի վաղ հայտնի Է դարձել, որ Հունաստանի կառավարությունը Ռուսաստանի կառավարությանը կխնդրի վերացնել գյուղատնտեսական արտադրանքի որոշ տեսակների մատակարարումների բռնարգելքը: Մասնավորապես, Աթենքն առաջարկում Է սահմանափակումները վերացնել նարնջի, ելակի եւ դեղձի համար: Համապատասխան բովանդակությամբ նամակը շուտով կուղարկվի ՌԴ-ի վարչապետ Դմիտրի Մեդվեդեւին:
Բաժանորդագրվեք մեր ալիքին Telegram-ում