Գավառի տարածքի համայնքներում սկսվել է ոռոգման համակարգերի հիմնանորոգումը
ԳԱՎԱՌ, 2 ՄԱՐՏԻ, ԱՐՄԵՆՊՐԵՍ: Գարնան առաջին օրվանից Գավառի ջրօգտագործողների ընկերությունում սկսվել են ոռոգման նախապատրաստական շրջանի աշխատանքները:
Ինչպես «Արմենպրես»-ին տեղեկացրեց «Գավառի ՋՕԸ» գործադիր տնօրեն Հայկ Սհոյանը, ընկերության միւջոցներով նորոգման ու գործարկման է նախապատրաստվում Գավառի Հացառատ թաղամասի պոմպակայանը, որը ոռոգման ջուր է մատակարարում թաղամասի հազարից ավելի տնտեսությունների: Ընկերության առաջնահերթ անելիքների ծրագրում է նաեւ «Լանջաղբյուր-1» եւ «Գեղարքունիք-2» ջրամբարների «հարամիների»/ջրգողների/ վերացումը եւ Սարուխան գյուղի «Աջափ» թաղամասի ջրանցքի հիմնանորոգումը: «Լանջաղբյուր-1» եւ «Գեղարքունիք-2» ջրամբարների «հարամիների»/ջրգողների/ վերացման համար ՀՀ գյուղնախարարությունը հատկացրել է 4 միլիոն 230 հազար դրամ, Սարուխան գյուղի «Աջափ» թաղամասի ջրանցքի հիմնանորոգման համար՝ 10 միլիոն դրամ:
«Աջափ» թաղամասում 1050 մետր երկարության ինքնահոս առվի հատվածի հողե պատնեշը փոխարինվում է ռետինե խողովակներով, որը 80 տոկոսով կրճատելու է մատակարարվող ջրի կորուստները: «Մինչեւ ոռոգման շրջանի սկիզբը վերոնշյալ շինարարական աշխատանքներն ավարտված կլինեն, շահառուներին ջուրը կմատակարարվի պահանջվելուն պես, կանոնավոր կերպով»,-վստահեցրեց Հայկ Սհոյանը:
Խոսրով Խլղաթյան
Բաժանորդագրվեք մեր ալիքին Telegram-ում