Գեղարքունիքում անցկացվում են Անդրանիկ Օզանյանի 150-ամյակի միջոցառումներ
ԳԱՎԱՌ, 27 ՓԵՏՐՎԱՐԻ, ԱՐՄԵՆՊՐԵՍ: Գեղարքունիքի մարզի հանրակրթական դպրոցներում եւ մշակութային հաստատություններում ընթանում են հայ ազատագրական շարժման հայտնի գործիչ, զորավար Անդրանիկ Օզանյանի ծննդյան 150-ամյակին նվիրված միջոցառումներ` գրական-երաժշտական ցերեկույթների եւ բաց դասերի տեսքով:
Ինչպես «Արմենպրես»-ին տեղեկացրին Գեղարքունիքի մարզպետարանի կրթության, մշակույթի եւ սպորտի վարչությունից, վերջին երեք օրերի ընթացքում մեծանուն զորավարի ծննդյան օրվան նվիրված գրական-երաժշտական ցերեկույթներ կամ բաց դասեր են անցկացվել Գավառի թիվ 4, Նորատուսի թիվ 3, Սեւանի թիվ 1, թիվ 3, թիվ 4, թիվ 5 Նորաշենի հիմնական, Գեղամավանի, Լճաշենի, Չկալովկայի, Դդմաշենի, Գագարինի, Լուսակունքի , Ծովակի, Նորակերտի, Ակունքի, Վարդենիսի թիվ 2, Գեղհովիտի թիվ 2, Լիճքի, Վարդենիկի թիվ 2, Վահանի հանրակրթական դպրոցներում: Մի շարք դպրոցներում հրատարակվել են նաեւ պատի թերթեր` նվիրված Անդրանիկի կյանքի ու գործունեության կարեւարագույն դրվագներին:
Նույն աղբյուրի հավաստմամբ՝ Անդրանիկ Օզանյանի ծննդյան 150-ամյակին նվիրված միջոցառումները կշարունակվեն ողջ տարվա ընթացքում: Վարդենիսի տարածաշրջանի դպրոցների մի մասը նախատեսել է Անդրանիկին նվիրված միջոցառումներ անցկացնել մարտ-ապրիլին, Մեծ Մասրիկի միջնակարգ դպրոցը՝ նոյեմբերին: Գեղարքունիքի մարզպետարանի աշխատակազմի ԿՄՍ վարչության կողմից նախատեսված գլխավոր միջոցառումը կանցկացվի նոյեմբերի երկրորդ կեսին, Վարդենիսի թիվ 4 հիմնական դպրոցում:
Խոսրով Խլղաթյան
Բաժանորդագրվեք մեր ալիքին Telegram-ում