Տորոնտոյի Հայ Ավետարանական եկեղեցու կիրակնօրյա դպրոցի սաները նվերներ են ուղարկել Վահանի դպրոցականներին
ԳԱՎԱՌ, 27 ՓԵՏՐՎԱՐԻ, ԱՐՄԵՆՊՐԵՍ: Տորոնտոյի Հայ Ավետարանչական եկեղեցու կիրակնօրյա դպրոցի սաները գրենական պիտույքներ պարունակող փաթեթների տեսքով նվերներ են ուղարկել Գեղարքունիքի սահմանամերձ Վահան գյուղի դպրոցականներին: Ինչպես «Արմենպրես»-ին տեղեկացրեց Վահանի միջնակարգ դպրոցի տնօրեն Լիաննա Մարտիրոսյանը, նվերները դպրոց են հասցրել եւ առաջինից չորրորդ դասարանների 49 աշակերտներին հանձնել ՀՀ Սփյուռքի նախարարության աշխատակիցները:
Վահան գյուղի դպրոցի տնօրինությունը, աշակերտները եւ մանկավարժները շոյված են զգում իրենց ոչ միայն նվերներից, այլ այն առանձնակի ուշադրությունից, որ իրենց նկատմամբ ցուցաբերել են Սփյուռքի մեր հայրենակիցները: «Մենք արդեն շնորհակալական նամակ ենք պատրաստել Տորոնտոյի Հայ ավետարանչական եկեղեցու կիրակնօրյա դպրոցի տնօրինությանը, սաներին, մեր հայրենակիցներին` նման բարյացակամ վերաբերմունքի ու հայրենանվեր ձեռնարկի համար: Մեր աշակերտներն էլ իրենց հերթին ցանկանում են նամակագրական կապ հաստատել իրենց բարերարների հետ, մոտիկից շփվել ու բարեկամանալ Սփյուռքի իրենց հայրենակիցներին: Օգտվելով առիթից` ուզում ենք Վահանի հասարակության շնորհակալական խոսքը փոխանցել Տորոնտոյի մեր հայրենակիցներին ու Սփյուռքի նախարարությանը, որոնց մտահոգում է դժվարին պայմաններում ապրող մեր գյուղը»,- նշեց դպրոցի տնօրենը:
Խոսրով Խլղաթյան
Բաժանորդագրվեք մեր ալիքին Telegram-ում