Շիրակի մարզում իրականացրել է «ԶԼՄ-ներն ու հաշմանդամությունը» ծրագիրը
ԳՅՈՒՄՐԻ, 27 ՓԵՏՐՎԱՐԻ, ԱՐՄԵՆՊՐԵՍ: Հաշմանդամության հետ կապված թեմաները և հաղորդումները պատրաստելիս և լուսաբանելիս լրատվամիջոցները պետք է հետևեն որոշակի կանոնների՝ օգտագործեն հատուկ եզրույթներ, չներկայացնեն այնպիսի լուսանկարներ կամ տեսանյութեր, որոնք կվիրավորեն հաշմանդամություն ունեցող անձանց: Սա է եղել Շիրակի մարզի լրատվական դաշտի որակը բարելավելու նպատակով, ՀՀ ԱՄՆ դեսպանության հասարակության հետ կապերի գրասենյակի դրամաշնորհի շրջանակներում, «Ագաթ» հատուկ կարիքներով կանանց կենտրոնի իրականացրած «ԶԼՄ-ներն ու հաշմանդամությունը» ծրագրի նխատակը: Ծրագրի շրջանակում կազմակերպվել են դասընթացներ, հրատարակվել ուղեցույցներ, պաստառներ և օրացույցներ:
«Ծրագրի նպատակը հասարակության իրազեկության բարձրացումն է՝ հաշմանդամություն ունեցող անձանց իրավունքերի վերաբերյալ: Ծրագրի շրջանակում հրատարակվել է ուղեցույց՝ ԶԼՄ ներկայացուցիչների և հաշմանդամություն ունեցող անձանց համար, որը կնպաստի հաշմանդամություն ունեցող անձանց առնչվող թեմաների ճիշտ լուսաբանմանը: Շատ հաճախ լրագրողների կողմից օգտագործվում է օրինակ անշարժունակ կամ հաշմանդամ՝ հաշմանդամություն ունեցող մարդ դարձվածքի, կույր՝ տեսողական խնդիր ունեցող, խուլ՝ լսողական խնդիր ունեցող անձ և այլ բառերի փոխարեն, ինչը շատ դեպքերում բացասաբար է ազդում հաշմանդամություն ունեցող անձանց վրա, իսկ երբեմն մասնագետները չունեն համապատասխան գիտելիքներ և կարողություններ, որպեսզի հաղորդումները պատրաստեն սոցիալական ներառման տեսանկյունից, լիրաժեք չեն տիրապետում հաշմանդամություն ունեցող անձից հարցազրույց վերցնելու ճիշտ ձևերին, լեզվին և տերմինաբանությանը»,-իր խոսքում նշեց հոգեբան Քրիստինե Աղանյանը` ներկայացնելով ծրագիրը:
Արմենուհի Մխոյան
Բաժանորդագրվեք մեր ալիքին Telegram-ում