Ավարտվել է վայրի բնության նմուշների ապօրինի առևտրի կանխարգելմանն ուղղված դասընթացը
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Երևանում փետրվարի 23-ից 27-ն անցկացվել է դասընթաց՝ ուղղված վայրի բնության նմուշների ապօրինի առևտրի կանխարգելմանը: Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի վարչությունից, դասընթացին մասնակցել են պետական, հասարակական կառույցների և լրատվամիջոցների ներկայացուցիչներ: Դասընթացի թեմաներում ներառված են եղել տեղեկատվություն վայրի տեսակների առևտրի կարգավիճակների, վայրի բնության դեմ հանցավորության և համապատասխան պատժամիջոցների, միջազգային կոնվենցիաների, ներպետական օրենսդրության, միջգործակալական համագործությունների մասին նյութերի:
Դասընթացն անցկացրել են «Կենդանիների պաշտպանության միջազգային հիմնադրամ»-ի ներկայացուցիչներ Մարիա Վորոնցովան (ԱՊՀ տարածաշրջանային տնօրեն), Վիվեկ Մենոնը (Հարավային Ասիայի տարածաշրջանային տնօրեն), Մոհամեդ Էլսայեդը (Մերձավոր Արևելքի տարածաշրջանային տնօրեն) և Չարլզ Մաքեյը (ոլորտի փորձագետ, դասընթացավար):
Վայրի բնության նմուշների ապօրինի առևտուրը վտանգված վայրի կենդանատեսակների և բուսատեսակների վերացմանը նպաստող հիմնական սպառնալիքներից է: Միլիարդավոր դոլարների շրջանառություն ունեցող անօրինական բիզնեսի այս տեսակը թմրանյութերի, զենքի անօրինական առևտրին և թրաֆիքինգին համարժեք հանցագործություն է:
Փետրվարի 25-ին դասընթացի շրջանակում IFAW դասընթացավարներին ընդունել է ՀՀ բնապահպանության փոխնախարար Խաչիկ Հակոբյանը: Փոխնախարարը, ողջունելով հյուրերին, նկատել է, որ կազմակերպված դասընթացների արդյունքում ոչ միայն անհրաժեշտ գիտելիքներ մատուցվեցին պատասխանատու գերատեսչությունների համապատասխան մասնագետներին, այլև ԶԼՄ-ներով լայնորեն լուսաբանվելու շնորհիվ հանրության մոտ բարձրացել է խնդրի վերաբերյալ իրազեկվածության աստիճանը: Փոխնախարը կարևորել է նաև խնդրի լուծման ուղղությամբ համագործակցության շարունակականությունը: Խաչիկ Հակոբյանը շեշտել է, որ միջոցառումը ՀՀ բնապահպանության նախարարության և հասարակական կազմակերպությունների արդյունավետ համագործակցության լավ օրինակ է:
Ռուսաստանի և ԱՊՀ տարածաշրջանային տնօրեն Մարիա Վորոնցովան, շնորհակալություն հայտնելով ՀՀ բնապահպանության նախարարությանը սեմինարին աջակցելու համար, իր հերթին կարևորել է վայրի բնության ապօրինի շահագործման դեմ պայքարի գործում պետական մարմինների և հասարակական կազմակերպությունների համագործակցությունը:
«Կենդանիների պաշտպանության միջազգային հիմնադրամ»-ի Հարավային Ասիայի տարածաշրջանային տնօրեն Վիվեկ Մենոնը նկատել է, որ կենդանիների մաքսանենգության դեմ պայքարը կարևոր է Հայաստանի համար նաև իր հարուստ կենդանական և բուսական աշխարհը պաշտպանելու համար: Հանդիպմանը քննարկվել են վայրի կենդանիների պաշտպանության և ապօրինի վաճառքի կանխարգելմանն ուղղված միջոցառումներին և հետագա համագործակցության մեխանիզմներին առնչվող հարցեր:
Հանդիպման ավարտին փոխնախարարը հյուրերին նվիրել է ՀՀ Կարմիր գրքի մեկական օրինակ` հույս հայտնելով, որ առաջիկա տարիներին նմանօրինակ միջոցառումների, հանրային իրազեկվածության և համատեղ ջանքերի արդյունքում գրքի ծավալը կփոքրանա:
Երևանում անցկացվող դասընթացի նպատակն էր նվազեցնել Հայաստանում վայրի բնության նմուշների ապօրինի շրջանառությունը և բարելավել կենդանիների պաշտպանության ստանդարտները՝ պատասխանատու կառույցների ներկայացուցիչների կարողությունների զարգացման միջոցով: Դասընթացի ավարտին բոլոր մասնակիցներն ստացել են մասնակցության հավաստագրեր:
Բաժանորդագրվեք մեր ալիքին Telegram-ում