«Սուրբ Սարգիս» խորագրով մանկապատանեկան ցուցահանդես է բացվել գեղագիտության կենտրոնում
ԵՐԵՎԱՆ, 30 ՀՈՒՆՎԱՐԻ, ԱՐՄԵՆՊՐԵՍ: Հ. Իգիթյանի անվան գեղագիտության ազգային կենտրոնում հունվարի 30-ին բացվել է «Սուրբ Սարգիս» խորագրով մանկապատանեկան ցուցահանդես: Ինչպես «Արմենպրես»-ին տեղեկացրին Արարատյան Հայրապետական թեմի տեղեկատվական բաժնից, ցուցահանդեսի հանդիսավոր բացումը կատարել են Արարատյան Հայրապետական թեմի առաջնորդական փոխանորդ գերաշնորհ տեր Նավասարդ արքեպիսկոպոս Կճոյանը և Գեղագիտության ազգային կենտրոնի տնօրեն Լևոն Իգիթյանը:
Շնորհակալություն հայտնելով ցուցահանդեսի կազմակերպիչներին, ուսուցիչներին ու երեխաներին՝ Սրբազան հայրը մասնավորապես ասել է. «Այսօր մենք գտնվում ենք հեքիաթային մի աշխարհում: Այս երեխաների աչքերով մենք նորովի վերարթնացնում ենք Սուրբ Սարգսի կերպարը մեր մեջ: Իրենց հասակում մեզ հեռացրել էին Սուրբ Սարգսից: Մեզ թելադրված հերոսներ էին մեր մտապատկերում ուրվագծվում: Բայց Սուրբ Սարգիսը դարերի միջից վերհառնեց, և մեզ հետ միասին այսօր երիտասարդների սիրո արագահաս բարեխոսը իր տոնակատարումն ունեցավ այս փոքրիկ իշխանիկների հոգիների մեջ: Նրանց աչքերով մենք տեսնում ենք վերարթնացած սիրո արագահաս բարեխոսի պատկերները իրենց կտավների վրա: Պետք է լսել այս երեխաներին. նրանք հետաքրքիր փիլիսոփայության մեջ են ապրում, ապշելու ընկալում ունեն իրենց շրջակա աշխարհի ու երևույթների հանդեպ: Ափսոսում եմ, որ քիչ առաջ նրանց մեկնաբանությունները, իրենց նկարների բացատրությունները միայն ինձ մոտ մնացին: Փոքրիկ Մարտիրոսին հաճախ կտեսնենք իրենց հասակակիցների գործերի մեջ: 1700 տարուց ավել է անցել, բայց Սուրբ Մարտիրոսին չենք մոռանում: Թող Սուրբ Մարտիրոսը լինի ձեզ համար բարեխոս, որպեսզի կատարվեն ձեր երազանքները»:
Կենտրոնի սաների անսովոր ու գեղեցիկ աշխատանքները, որոնք նվիրված են տոնին, արդեն չորրորդ տարին ներկայացվում են հանրությանը:
Շաբաթներ շարունակ 6-15 տարեկան պատանիներն, աշխատելով իրենց ուսուցիչների հետ, ստեղծել են իսկական գլուխգործոցներ: Նրանք հանդիպել են տեր Նավասարդ Սրբազանի, թեմի քահանաների հետ, լսել սրբի մասին պատմություններ, սիրո ու նվիրումի մասին զրույցներ, որպեսզի կարողանան իրենց աշխատանքներում լավագույնս ներկայացնել ազգային կերպարներ:
Ամեն տարի Արարատյան Հայրապետական թեմը մասնակիցներին նվեր է պարգևում՝ ստեղծագործական այս աշխատանքների կատալոգ տպագրելով: Այս տարի կատալոգից բացի, թեմը նվեր է տրամադրել նաև համակարգիչ, որով կենտրոնի սաները կկարողանան ձևավորել ոչ միայն այս տարվա կատալոգը, այլ նաև շատ ուրիշ աշխատանքների ժողովածուներ:
Բաժանորդագրվեք մեր ալիքին Telegram-ում