ԵՏՄ միջկառավարական խորհրդի առաջին նիստը տեղի կունենա փետրվարի 6-ին
ՄՈՍԿՎԱ, 29 ՀՈՒՆՎԱՐԻ, ԱՐՄԵՆՊՐԵՍ: Եվրասիական տնտեսական միության միջկառավարական խորհրդի առաջին նիստը տեղի կունենա փետրվարի 6-ին` Մոսկվայում, որին կմասնակցեն Հայաստանի, Ռուսաստանի, Բելառուսի, Ղազախստանի և Ղրղզստանի կառավարությունների ղեկավարները: Ինչպես հաղորդում է «Արմենպրես»-ը` այդ մասին տեղեկացրել է ՌԴ կառավարության մամուլի ծառայությունը:
Նիստում կքննարկվի ԵՏՄ-ին` Ղրղզստանի միանալու հարցը:
«Հանդիպման ընթացքում նախատեսվում է դիտարկել ինտեգրացիոն օրակարգի հարցերի լայն շրջանակ, որոնք առնչվում են ԵՏՄ-ի գործառնությանը, իրավապայմանագրային բազայի զարգացմանը, ինչպես նաև համագործակցության մի շարք հստակ ծրագրերի իրականացմանը, այդ թվում նորարության ոլորտում»,- նշված է տեղեկատվության մեջ:
Նիստի նախօրեին ՌԴ վարչապետ Դմիտրի Մեդվեդևն առանձին հանդիպումներ կունենա` երկկողմ համագործակցության օրակարգային հարցերի քննարկման նպատակով:
Բաժանորդագրվեք մեր ալիքին Telegram-ում