Հայոց բանակի 23-րդ տարեդարձը նշվեց Արարատի մարզում
ԱՐՏԱՇԱՏ, 28 ՀՈՒՆՎԱՐԻ, ԱՐՄԵՆՊՐԵՍ: Հայոց բանակի 23-րդ տարեդարձի կապակցությամբ, Արարատի մարզի N զորամասում այսօր տեղի ունեցավ հանդիսավոր արարողություն: Հրամանատարական կազմը շնորհավորեց զինվորներին տոնական օրվա կապակցությամբ եւ իր խոնարհումն արտահայտեց զոհված զինվորների հիշատակին:
Տոնական օրվա կապակցությամբ զորամաս այցելեցին նաեւ դպրոցների բարձր դասարանի աշակերտները` զինղեկների գլխավորությամբ: Նրանք իրենց շնորհավորական խոսքում նշեցին, որ շուտով` մի քանի տարի անց, իրենք էլ համալրելու են հայոց բանակի շարքերը: Զինվորների եւ աշակերտների ուժերով կազմակերպվեց համերգ:
Հայոց բանակի 23-րդ տարեդարձի կապակցությամբ Արարատ գյուղի ուսուցիչները, աշակերտները եւ մտավորականներն այցելեցին Վազգեն Սարգսյանի տուն-թանգարան: Այնտեղ նրանք ծանոթացան Սպարապետի անտիպ նամակներին, անձնական իրերին, կարդացին նրա հորդորները, որոնք ուղղված են բոլոր դարերում ապրող հայերին: Սրահում հնչում էր Սպարապետի ձայնը. «…..Մենք իրավուն չունենք թյուրիմացությունների, անվստահության, անմիաբանության պատճառով հանկարծ տանուլ տանք արյունով ու մաքառումով ձեռք բերվածը»:
Աշակերտները գրառումներ կատարեցին նաեւ հուշամատյանում: Բազմաթիվ պատանիների գրվածքների կողքին ուշագրավ էին 12-րդ դասարանցու հետեւյալ տողերը. «Երկաթյա Սպարեպետ, միայն մեր հայրենի հողը պահելով եւ պապենական հողերը հետ բերելով կարող եմ արժանանալ քո հայրենակիցը կոչվելուն»:
Աշակերտները հանդես եկան ֆիդայական, հայրենասիրական, կարոտի եւ բանակը փառաբանող երգերով:
Տոնական համերգ անցկացվեց նաեւ Արարատ քաղաքում` արվեստի դպրոցի սաների ուժերով, որին մասնակցում էր նաեւ քաղաքապետ Հայկ Հայկյանը:
Միջոցառումներ են կազմակերպվել նաեւ մարզի դպրոցներում:
Լիլիթ Մաճկալյան
Բաժանորդագրվեք մեր ալիքին Telegram-ում