Ասադը մեղադրել է Էրդողանին
ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ: Սիրիայի Նախագահ Բաշար ալ Ասադը ծանր մեղադրանքներ է հնչեցրել Թուրքիայի Նախագահ Ռեջեթ Թայիփ Էրդողանի դեմ: Ինչպես հաղորդում է «Արմենպրես»-ը, ամերիկյան Foreign Affairs հանդեսին տված հարցազրույցում Ասադը Էրդողանին «Ալ Կաիդա»-ի եգիպտական «Մուսուլման եղբայրներ» կազմակերպության «գաղափարական աջակից» է անվանել:
Հանդեսի թղթակցի այն հարցին` «Էրդողանի՞ն եք մեղադրում, ում հետ մի ժամանակ լավ հարաբերություններ եք ունեցել», Ասադը պատասխանել է. «Այո: Քանի որ Էրդողանը կապված է «Ալ Կաիդա»-ին կից «Մուսուլման եղբայրների» գաղափարախոսությանը: Դրանք 20-րդ դարի սկզբին բռնություն տարածող` քաղաքական իսլամը գերադասող առաջին իսլամիստական կազմակերպություններն են: Իսկ նա ամուր կերպով հավատում է այդ արժեքներին: Էրդողանը ֆանատիկոս է»:
Բաժանորդագրվեք մեր ալիքին Telegram-ում