ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Թենիսի «Մեծ սաղավարտ»-ի տարվա առաջին մրցաշարում` Ավստրալիայի բաց առաջնությունում, հայտնի են քառորդ եզրափակիչի առաջին մասնակիցները:

Աշխարհի  երրորդ ռակետ, իսպանացի Ռաֆայել Նադալը 4-րդ շրջանում 7-5, 6-1, 6-4 հաշվով հետագա պայքարից դուրս թողեց Քևին Անդերսոնին: Քառորդ եզրափակիչի մյուս ուղեգրի համար պայքարում էին Թոմաս Բեդրիխը և Բերնարդ Տոմիչը: Չեխ Բեդրիխին հաջողվեց արագ`  6-2, 7-6, 6-2 հաշվով առավելության հասնել մրցակցի նկատմամբ:

Ավստրալիայի բաց առաջնությունն անցկացվում է արդեն 103-րդ անգամ: Մինչև 1987 թվականը մրցաշարն անցկացվում էր կանաչ սիզամարգի վրա: Ավստրալիայի բաց առաջնությունում ամենաշատը` 4 անգամ, հաղթել են Անդրե Աղասին, Նովակ Ջոկովիչը և Ռոժե Ֆեդերերը: Կանանց պայքարում ամենատիտղոսակիրն ԱՄՆ-ի ներկայացուցիչ Սերենա Վիլիամսն է: