Դինքի գործով ձերբակալված ոստիկանը մեղադրել է իր պետերին
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Հրանտ Դինքի սպանության գործով ձերբակալված ոստիկան Մուհեթին Զենիթը հարցաքննության ժամանակ մեղադրել է իր վերադաս պաշտոնյաներին այն բանում, որ վերջիններս իրեն դրդել են հեռախոսազրույց ունենալ սպանության կազմակերպիչների հետ:
Ինչպես հաղորդում է «Արմենպրես»-ը` վկայակոչելով թուրքական DemokratHaber կայքը, ցուցմունքում Զենիթն ասել է, որ իր հրամատարներն այդ գործում իրեն որպես «խայծ» են օգտագործել: Նա ասել է, որ հանցագործներից մեկի` Տրապիզոնի ոսոտիկանության հետախուզուկան վարչության գործակալ Էրհան Թունջելի հետ սպանության օրն զրուցել իրեն դրդել է վերջերս ձերբակալված Ջիզրեի ոստիկանապետ Էրջան Դեմիրը, ով հանցագործության ժամանակաշրջանում զբաղեցրել է Տրապիզոնի ոստիկանութւյան հետախուզական բաժնի պետի պաշտոնը:
«Նրանք ինձ որպես խայծ օգտագործեցին: Նախ հեռախոսազրույց կազմակերպեցին, հետո այդ զրույցի ձայնագրությունը հանձնեցին մամուլին, եւ ինձ որպես մեղավոր ներկայացրին: Իսկ իրական մեղավորներն այդ ճանապարհով քողարկվեցին»,- ասել է Զենիթը:
Թուրք ոստիկանը նշել է, որ Դինքի սպանությունից անմիջապես հետո իր հրամանատարներ` Տրապիզոնի ոստիկանության եւ հետախուզության նախկին պաշտոնյաներ Էրջան Դեմիրը, Էնգին Դինչը եւ Ֆարուք Սարըն իրեն ստիպել են զանգահարել Թունջելին եւ հայտնել նրան, որ տեղյակ է եղել սպանության ծրագրի մասին:
Ստամբուլի «Ակոս» թերթի հայազգի խմբագրապետ Հրանտ Դինքը սպանվել է 2007 թվականի հունվարի 19-ին` խմբագրության առջեւ նրա վրա կատարված զինված հարձակման արդյունքում:
2012 թվականի հունվարի 17-ին դատարանի որոշմամբ` Դինքի սպանության կազմակերպիչ Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը` 22 տարվա ազատազրկման:
2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում է կայացրել Հրանտ Դինքի սպանության գործով դատավարությունը սկսել զրոյից: Այս անգամ բոլոր ամբաստանյալներին կառաջադրվի «հանցավոր խմբավորման ստեղծման եւ կառավարման կամ դրանում մասնակցություն ունենալու» մեղադրանք: Բացի այդ, Դինքի սպանության ժամանակ բարձր պաշտոններ զբաղեցրած 9 անձանց, այդ թվում` Ստամբուլի նախկին ոստիկանապետ Ջելալեթին Ջերահի նկատմամբ դատական գործեր հարուցելու կապակցությամբ որոշումներ են ընդունվել:
Բաժանորդագրվեք մեր ալիքին Telegram-ում