Վերին Գետաշեն գյուղը գիշերային ժամերին լուսավորվում է արդեն ամբողջությամբ
ԳԱՎԱՌ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Վերին Գետաշեն գյուղում տեղական բյուջեից հատկացված 16 միլիոն դրամի հաշվին ավարտվել է 7 կիլոմետր երկարության գիշերային լուսավորվածության ցանցի կառուցումը 4 թաղամասերում, որով եւ ամբողջացել է գյուղի բոլոր թաղամասերի գիշերային լուսավորվածության ապահովումը: Ինչպես «Արմենպրես»-ին տեղեկացրեց Վերին Գետաշենի գյուղապետ Ռուբիկ Ղուկասյանը, վերջին մի քանի տարիների ընթացքում տեղական բյուջեի միջոցների հաշվին կամ գյուղի բարերարների հատկացված միջոցներով Վերին Գետաշենում կառուցվել է մոտ 30 կիլոմետր երկարության գիշերային լուսավորվածության ցանց, տեղադրվել 785 լուսատու: «Այժմ արդեն լուսավորվում են գյուղի թե՛ կենտրոնական, թե՛ երկրորդային նշանակության բոլոր փողոցները` մի բան, որ դժվար կլիներ պատկերացնել նույնիսկ խորհրդային տարիներին: Սրանով լուծված կարելի է համարել համայնքի համար շատ կարեւոր նշանակության ծրագրերից մեկը»,- նշեց համայնքի ղեկավարը:
Խոսրով Խլղաթյան
Բաժանորդագրվեք մեր ալիքին Telegram-ում