ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Շախմատի Հայաստանի հավաքականի անդամ Վլադիմիր Հակոբյանը միաժամանակյա շախմատային սեանս անցկացրեց Արարատյան Հայարպետական թեմի քահանաների, երիտասարդների և Ավանի շախմատի դպրոցի սաների հետ:

«Նախորդ տարի որոշեցինք, որ սուրբ Աբգար թագավորի տոնին պետք է շախմատային մրցաշար անցկացնենք: Պետք է ոչ միայն շախմատի միջոցով շփվենք միմյանց հետ, այլ նաև երիտասարդներն իրենց մտավոր կարողությունները ցույց տան: Եվ, իհարկե, սա համախմբվելու ևս մեկ առիթ է»,- «Արմենպրես»-ի հետ զրույցում նշեց Արարատյան Հայրապետական թեմի երիտասարդաց միությունների հոգևոր պատասխանատու Տեր Պետրոս ավագ քահանա Մալյանը:

Վլադիմիր Հակոբյանի խոսքով` միաժամանակյա սեանսները դժվար են լինում, և ինքն առաջին անգամ պետք է շախմատ խաղար քահանաների հետ: «Ամեն բան, ինչը որ արվում է շախմատի մասսայականացման համար, միշտ էլ հետաքրքիր է: Հավասարը հավասարի հետ չենք լինելու, քանի որ միաժամանակյա սեանս է, սակայն նրանք կարգ չունեն»,- ասաց Հակոբյանը:

Արդեն երկրորդ տարին անընդմեջ Արարատյան Հայրապետական թեմը սուրբ Աբգար թագավորի տոնի առթիվ կազմակերպում է շախմատային միաժամանակյա խաղ, նախորդ տարի խաղը վարեց Գաբրիել Սարգսյանը: