ԱԺ փոխնախագահն անդրադարձել է Բելառուսի փոխարտգործնախարարի հայտարարությանը
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղը դե ֆակտո անկախ հանտապետություն էˋ իր ընտրված իշխանություններով, և մեր նպատակն է հասնել նրա ժողովրդի կամքի իրականացմանը: «Արմենպրես»-ի փոխանցմամբˋ ՀՀԿ գործադիր մարմնի նիստից հետո այս մասին նշեց ՀՀԿ մամուլի խոսնակ, ՀՀ ԱԺ փոխնախագահ Էդուարդ Շարմազանովը: «Մեր նպատակն է Լեռնային Ղարաբաղի միջազգային ճանաչումը և ԼՂՀ ժողովրդի կամքի իրականացումը»,- շեշտեց նա: Անդադառնալով լրագրողի այն դիտարկմանը, թե Բելառուսի արտգործնախարարի առաջին տեղակալ Ալեքսանդր Միխնևիչն այսօր հայտարարել էր, որ ԵՏՄ-ին Հայաստանի միանալուց հետո Լեռնային Ղարաբաղը միության անդամ չի դառնաˋ Շարմազանովը նշեց, որ բանավոր կերպով բազմիցս նշվել է, որ ԼՂՀ-ն իրավական առումով, այսինքն՝ դե յուրե, Հայաստանի Հանրապետության մաս չէ: «Եթե որևէ մեկը կարծում է, որ այն դե յուրե ՀՀ մաս է, ապա մոլորության մեջ է, ԼՂՀ-ն դե ֆակտո անկախ պետություն է և շուտով դառնալու է դե յուրե անկախ հանրապետություն»,- հայտարարեց նա:
Բելառուսի փոխարտգործնախարարի հայտարարությունում նաև նշվել էր, որ պայմանագրին նոտա է ավելացվել, որ ԼՂՀ-ն ՀՀ մաս չէ:
Բաժանորդագրվեք մեր ալիքին Telegram-ում