Մասիսի ծննդատունը վերազինվեց անհրաժեշտ բժշկական սարքավորումներով
ԱՐՏԱՇԱՏ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Մասիսի բժշկական կենտրոնը դեկտեմբերի 19-ին վերազինվեց 21 հազար դոլար արժողությամբ 12 անուն բժշկական սարքավորումներով: Այդ առիթով բժշկական կենտրոն էին այցելել գումարը տրամադրած կազմակերպությունների ղեկավարները: Հյուրերին դիմավորեցին մարզպետարանի աշխատակազմի առողջապահության եւ սոցիալական ապահովության վարչության պետ Ստեփան Խաչատրյանը, բժշկական կենտրոնի տնօրեն Ալեքսանդր Ղուկասյանը:
«Արմենպրես»-ի փոխանցմամբ` բարեգործության շրջանակներում հիվանդանոցին տրամադրվեցին թերհաս ծնված եւ առողջական խնդիրներով երեխաների խնամքի համար անհրաժեշտ սարքավորումներ` վերակենդանացման սարք, տաքացուցիչ, երակային ներարկման պոմպ, շնչառական թերապիայի համակարգ: Հիշյալ սարքավորումները հնարավորություն կտան հիվանդանոցին ցուցաբերելու անհրաժեշտ բուժօգնություն, իսկ բարդ ընթացող հղիությունների համար այցելուներն այլեւս չեն դիմի մայրաքաղաքի ծննդատներ:
Մասիսի բժշկական կենտրոնի տնօրեն Ալեքսանդր Ղուկասյանը շնորհակալություն հայտնեց բարեգործներին` ցուցաբերած աջակցության համար: «Թեեւ կենտրոնի բժշկական անձնակազմն ունի մասնագիտական բարձր կարողություններ, այնուամենայնիվ, մինչ սարքավորումներ ձեռք բերելը հնարավոր չէր հասուն եւ անհաս երեխաներին անհրաժեշտ օգնություն ցույց տալ: Այդ սարքավորումներն այսուհետ կտեղադրվեն ծնարանում, որով նորածիններին ցույց կտրվի հրատապ օգնություն»,- նշեց բուժհաստատության ղեկավարը:
Մասիսի բժշկական կենտրոնում այս տարվա ընթացքում ծնվել է 667 երեխա:
Լիլիթ Մաճկալյան
Բաժանորդագրվեք մեր ալիքին Telegram-ում