Կենդանաբանական այգին վերակառուցման կենթարկվի
ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Երևանի կենդանաբանական այգին վերակառուցման կենթարկվի: Այս մասին լրագրողների հետ զրույցում նշեց Երևանի քաղաքապետի առաջին տեղակալ Կամո Արեյանը: Նրա խոսքով՝ այգու վերակառուցման վրա կծախսվի 300 միլիոն դրամ:
«Մշակվել է այգու փոփոխությունների մեծ նախագիծ. կիրականացվի մուտքի վերակառուցում, նոր զոոկլինիկայի ստեղծում, որը կսպասարկի ամբողջ այգին: Դրանից հետո այգու ներսի հատվածների, ինչպես նաև կվերակառուցվեն տոմսարկղերը»,- «Արմենպրես»-ի փոխանցմամբ՝ նշեց Կամո Արեյանը:
Նրա խոսքով՝ վերակառուցման շնորհիվ այգում թարմություն կմտցվի: «Փորձում ենք մաս-մաս թարմացնել այգին և ավելի մատչելի դարձնել մարդկանց համար: Բացի այդ, փոքրիկ զբոսայգի է ձևավորվելու երեխաների համար»,- նշեց Արեյանը:
Երևանի կենդանաբանական այգու ստեղծման գաղափարն իրականություն է դարձել 1940-ին` Հայաստանի Գերագույն Խորհրդի որոշմամբ: Սկզբնական շրջանում կենդանաբանական այգում միայն 2 տասնյակ կենդանիներ ու թռչուններ էին, որոնք ձեռք էին բերվել Երևանում անցկացվող 12-րդ պետական կենդանաբանական ցուցահանդեսում:
Բաժանորդագրվեք մեր ալիքին Telegram-ում