ՀՀ և ՌԴ արտգործնախարարությունների միջև կայացել են քաղաքական խորհրդատվություններ
ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: ՌԴ արտաքին գործերի նախարարությունում դեկտեմբերի 17-ին կայացել են ռուս-հայկական քաղաքական խորհրդատվություններ անվտանգության, սպառազինությունների վերահսկման և զանգվածային ոչնչացման զենքերի չտարածման խնդիրների շուրջ: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, հայկական կողմից խորհրդատվությունները վարել է ՀՀ ԱԳՆ Սպառազինությունների վերահսկման և միջազգային անվտանգության վարչության պետ Սամվել Մկրտչյանը, իսկ ռուսական կողմից` ՌԴ ԱԳՆ Չտարածման և սպառազինությունների վերահսկման հարցերով դեպարտամենտի տնօրեն Մ. Ուլյանովը:
Հանագամանալից քննարկվել է սովորական սպառազինությունների վերահսկման ոլորտում տիրող իրավիճակը, Զենքի առևտրի պայմանագրին, Չտարածման պայմանագրի 2015թ. կայանալիք վերանայման համաժողովին, միջուկային զինաթափմանը և միջուկային զենքից ազատ գոտիների ստեղծմանն առնչվող հարցեր:
Անդրադարձ է եղել Իրանի միջուկային ծրագրի շուրջ ընթացող միջազգային բանակցային գործընթացին:
Կողմերը գոհունակությամբ արձանագրել են միջազգային տարբեր հարթակներում ընդլայնվող համագործակցությունը, նախանշել փոխգործակցության նոր օրակարգային հարցեր:
Բաժանորդագրվեք մեր ալիքին Telegram-ում