Գեղարքունիքի համայնքները կազմում եւ հաստատում են 2015 թվականի բյուջեները
ԳԱՎԱՌ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի համայնքերում դեկտեմբերի երկրորդ կեսերից սկսվել եւ ընթանում է տեղական բյուջեների նախագծերի կազմման եւ հաստատման գործընթացը: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի ֆինանսական եւ սոցիալ-տնտեսական զարգացման վարչության ֆինանսատնտեսագիտական բաժնի վարիչ Գոռ Ղազարյանը, տեղական բյուջեների նախագծերը կազմվում են պետական բյուջեի ընդունումից հետո, երբ արդեն պարզ են դառնում համայնքներին տրամադրվող դոտացիաների ելակետային տվյալները:
Տեղական բյուջեների նախագծերը քննարկվում են համայնքների ավագանու նիստերում եւ ներկայացվում Գեղարքունիքի մարզպետարանի ֆինանսական եւ սոցիալ-տնտեսական զարգացման վարչություն՝ առաջարկություններ, դիտողություններ, մեթոդական ցուցումներ ստանալու նպատակով: Մարզպետարանի կողմից առարկություն չստանալու դեպքում դրանք ներկայացվում են ավագանու հաստատմանը: «Մինչեւ տարեվերջ բոլոր համայնքները մարզպետարան կներկայացնեն տեղական բյուջեների նախագծերը: Բոլորն էլ մեր կողմից ստանում են օրենքից բխող անհրաժեշտ ցուցումներ եւ մեթոդական օգնություն: Որոշ համայնքներ կարող են մինչեւ տարեվերջ ավագանու նիստով հաստատել տեղական բյուջեները, բայց սովորաբար եւ հիմնականում դա անում են հաջորդ տարվա հունվարի ընթացքում»,-նշեց բաժնի վարիչը:
Խոսրով Խլղաթյան
Բաժանորդագրվեք մեր ալիքին Telegram-ում