Փեշմերգան լայնածավալ գործողություններ է սկսել Սինջարի շրջանի ազատագրման համար
ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Փեշմերգան դեկտեմբերի 17-ին լայնածավալ ռազմական գործողություններ են սկսել՝ փորձելով «Իսլամական պետությունից» ազատագրել Իրաքի հյուսիս-արևմուտքում գտնվող Սինջարի շրջանը: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այդ քրդական ուժերին օժանդակում են միջազգային դաշինքի օդանավերը, որոնք երեկվանից հարվածում են ԻՊ-ի դիրքերը Զամարի և Սինջարի շրջաններում: Տեղեկություններ կան, որ փեշմերգային արդեն հաջողվել ԻՊ-ից ազատագրել 3 գյուղ, որոնք գտնվում են Սինջարի և Սիրիայի սահմանի մերձակայքում գտնվող Ռաբիա շրջանների միջև:
Մյուս կողմից, ԻՊ-ն լուրջ կորուստներ է կրել Իրաքի արևմուտքում գտնվող Հադիսա քաղաքին միջազգային դաշինքի օդային հարվածների հետևանքով: Իրաքյան ուժերը հաջողություններ են գրանցել Սամրա քաղաքի ծայրամասերում:
Գերմանիայի կառավարությունը որոշում է ընդունել Իրաքյան Քրդստան ուղարկել մոտ 100 ռազմական մասնագետի, ովքեր վարժանքներ կանցկացնեն քրդական ուժերի հետ` ԻՊ-ի դեմ պայքարելու համար: Նախատեսվում է վարժանքներն անցկացնել Արբիլ քաղաքում: Ավելի վաղ Բեռլինը որոշել էր ավելացնել քրդական ուժերի զինման համար նախատեսված գումարը 70 միլիոն եվոյով:
ԻՊ կազմակերպությունը ձևավորվել է 2006 թ.-ին` այժմ ընդգրկվելով 80 երկրի մոջահեդների: «Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և, միևնույն ժամանակ, ամենահարուստ ահաբեկչական կազմակերպությունը, որը կարճ ժամանակում հսկայական տարածքներ է գրավել Սիրիայում և Իրաքում:
Բաժանորդագրվեք մեր ալիքին Telegram-ում