Ադրբեջանն աշխարհում ամենաշատ լրագրողներ ձերբակալած երկրների տասնյակում է
ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Լրագրողների պաշտպանության կոմիտեն (Committee to Protect Journalists - CPJ) դեկտեմբերի 17-ին հրապարակել է ձերբակալված լրագրողների թվով աշխարհում առաջատար երկրների ցուցակը, որում Ադրբեջանը նշված է առաջին տասնյակի մեջ:
Ինչպես հաղորդում է «Արմենպրես»-ը, կոմիտեն հայտնել է, որ 2014 թվականին աշխարհի տարբեր երկրներում 220 լրագրողներ գտնվում են կալանավայրերում: 2013 թվականի համեմատ, 2014 թվականին ձերբակալված լրագրողների թիվն 9-ով աճել է:
Զեկույցի առաջին տասնյակում նշված են Չինաստանը, Էրիթրեան, Եթովպիան, Իրանը, Վիետնամը, Սիրիան, Եգիպտոսը, Բիրման, Ադրբեջանը եւ Թուրքիան:
CPJ-ին նման զեկույց սկսել է հրապարակել 1990 թվականից: Զեկույցում նշվում է, որ ներկայում Ադրբեջանի բանտերում 9 լրագրող կած, որոնցից 4-ը պետական մամուլին այլընտրանք ստեղծելու համար գրել են սոցիալական ցանցերում: Նրանք ձերբակալվել են Facebook սոցիալական ցանցում խմբեր ստեղծելու եւ կառավարելու համար: Այդ ակտիվիստները մեկնաբանություններ են հրապարակել մարդու իրավունքների խախտումների եւ պետական մակարդակով կոռուպցիոն գործողությունների մասին:
Իրենց հերթին, Ադրբեջանի իշխանությունները հերքում են երկրում արտահայտվելու ազատությունը խախտելու պատճառով որեւէ լրագրող կամ ակտիվիստ ձերբակալվելու փաստը եւ նշում, որ դատապարտվածները պատիժ են կրում կատարած հանցագործությունների համար:
Բաժանորդագրվեք մեր ալիքին Telegram-ում