Թբիլիսիում բացվում Է 15-րդ միջազգային կինոփառատոնը
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Թբիլիսյան 15-րդ միջազգային կինոփառատոնը, որը կազմակերպիչներն այս տարի անվանել են «կանաչ», Վրաստանի մայրաքաղաքում կանցկացվի դեկտեմբերի 1-ից մինչեւ 7-ը: Ամեն տարի կինոփառատոնի կազմակերպիչներն ընտրում են սոցիալական որեւԷ հրատապ թեմա, որին նվիրվում Է մի ամբողջ սեկցիա, բազմաթիվ բանավեճեր եւ միջոցառումներ. այս տարի այդ թեման դարձել Է բնապահպանական իրադրությունը եւ ուրբանիզացումը, տեղեկացնում Է «Արմենպրես»-ը՝ հղում անելով «Նովոստի Գրուզիա»-ին:
Կինոփառատոնը կբացի իրանցի հայտնի ռեժիսոր Մոհսեն Մահմալբաֆի «Նախագահը» ֆիլմը, որի նկարահանումները տեղի են ունեցել Վրաստանում:
Թբիլիսիի միջազգային կինոփառատոնի շրջանակներում կցուցադրվի շուրջ 150 կինոնկար. փառատոնին մասնակցելու համար Վրաստան կժամանեն 29 երկրների 80 ռեժիսորներ: Այս տարի ժյուրիի նախագահ Է ընտրվել իտալացի կինոքննադատ, կինոգետ եւ պրոդյուսեր Մարկո Մյուլլերը: Փառատոնի ժյուրին ի հայտ կբերի լավագույն ֆիլմ եւ լավագույն ռեժիսոր անվանակարգերի երկու հաղթողներին: Բացի այդ, ամեն տարի փառատոնի շրջանակներում շնորհվում են մի շարք հատուկ մրցանակներ, այդ թվում՝ Սերգեյ Փարաջանովի անվան հատուկ կինոգեղագիտության համար պարգեւը:
Կինոփառատոնն անցկացվում Է կինոարվեստի «Պրոմեթեւս» կենտրոնի կողմից՝ Վրաստանի մշակույթի եւ հուշարձանների պահպանության նախարարության եւ Կինեմատոգրաֆիայի ազգային կենտրոնի աջակցությամբ: Փառատոնի գլխավոր նպատակն Է՝ նպաստել մշակույթների մերձեցմանը եւ վրաց հանրությանը ծանոթացնել համաշխարհային լավագույն կինոնախագծերին:
Բաժանորդագրվեք մեր ալիքին Telegram-ում