ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Ազգային ժողովի ՀՀԿ խմբակցության ղեկավար Վահրամ Բաղդասարյանը կարծում է, որ ՀԱԿ խմբակցության պատգամավոր Նիկոլ Փաշինյանը, ՀՀ Նախագահին պաշտոնական անելու վերաբերյալ ԱԺ որոշման նախագիծ ներկայացնելով, ստուգում է ընդդիմադիր դաշտը: Ազգային ժողովում լրագրողների հետ զրույցում Վահրամ Բաղդասարյանը նշեց, որ այդպիսով Նիկոլ Փաշինյանի նախաձեռնությունից կերևա, թե ով ով է: «Նիկոլ Փաշինյանը շատ հետաքրքիր քայլ է կատարել. նա ստուգում է ընդդիմադիր դաշտը, իսկ ընդդիմադիր դաշտում տարբեր պահանջներ կան, ոչ բոլորն են պահանջում Սերժ Սարգսյանի հրաժարականը: Արդեն կերևա, թե ով է պահանջում Նախագահի հրաժարականը»,- «Արմենպրես»-ի հաղորդմամբ՝ ընդգծեց Բաղդասարյանը:  

Նա նաև նշեց, որ իր համար պարզ է, թե ով է ընդդիմություն, իսկ ինչն իր համար պարզ է, ինքը չի ստուգում:

Ազգային ժողովի ՀԱԿ խմբակցության պատգամավոր Նիկոլ Փաշինյանը ՀՀ Նախագահին պաշտոնանկ անելու վերաբերյալ ԱԺ որոշման նախագիծ է մշակել: Պատգամավորը երեկ «Ֆեյսբուք»-ի իր էջում գրել էր, որ որոշման նախագիծն արդեն գրեթե պատրաստ է և որոշ խմբագրումներից հետո կներկայացվի հանրությանը: