«Արմենպրես»-ի և ալբանական ATA գործակալության համաձայնագիրը կօգնի ժողովուրդներին ավելի լավ ճանաչել միմյանց
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես»-ի և ալբանական ATA ազգային լրատվական գործակալության միջեւ ստորագրվել է համագործակցության համաձայնագիր: Երեւանում փաստաթուղթը ստորագրել են «Արմենպրես» լրատվական գործակալության տնօրեն Արամ Անանյանը եւ ATA-ի տնօրեն Գեզիմ Պոտգորիցան: Համագործակցության համաձայնագիրը կողմերին տեղեկատվական նյութերի ու փորձի փոխանակման հնարավորություն կտա: «Մենք մեծապես կարեւորում ենք համագործակցությունն ազգային լրատվական գործակալությունների միջեւ: Այս առումով մեր ալբանական գործընկերների հետ համագործակցության մեկնարկը կնպաստի փոխճանաչողության խորացմանը, երկու ժողովուրդների միջեւ կապերի ամրապնդմանը եւ նոր հեռանկարներ կբացի տարբեր ոլորտներում երկխոսության մեկնարկի ու զարգացման համար: «Արմենպրես»-ը բաց է նմանօրինակ համագործակցության ընդլայնման եւ զարգացման համար` երկկողմ եւ բազմակողմ բոլոր ձեւաչափերում»,-ասաց «Արմենպրես»-ի տնօրեն Արամ Անանյանը:
Ստորագրված փաստաթուղթը, ATA լրատվական գործակալության տնօրեն Գեզիմ Պոտգորիցայի գնահատմամբ, հնարավորություն կտա Հայաստանի և Ալբանիայի ժողովուրդներին ավելի լավ ճանաչել միմյանց: «Մերձսևծովյան երկրների ազգային լրատվական գործակալությունների ասոցիացիայի բոլոր անդամները, ինչպես նաև Երևանում տեղի ունեցած ասոցիացիայի գլխավոր ասամբլեայի 7-րդ նիստի շրջանակներում մեզ հետ համագործակցության համաձայնագիր ստորագրած «Արմենպրես» լրատվական գործակալությունը ունեն համատեղ աշխատանքի համընդհանուր տեսլական: Նրանք իրավունք ունեն կիսվելու միմյանց հետ ինչպես նորություններով, այնպես էլ լուսանկարներով, տեսանյութերով և այլ մեդիա բովանդակությամբ: Ժամանակակից տեխնոլոգիաների կիրառումը կօգնի մեզ միասին լինել ավելի որակյալ և ուժեղ: Եվ մեր համագործակցությունը չի սահմանափակվի զուտ հանդիպումներով», - ասաց Գեզիմ Պոտգորիցան:
«Արմենպրես»-ի հետ զրույցում ալբանական ազգային լրատվական գործակալության ղեկավարը նաև նշեց, որ լինելով փոքր կազմակերպություն` իրենց ֆինանսական հնարավորությունները սուղ են, սակայն հաշվի առնելով ժամանակակից աշխարհում արագ զարգացող տեխնոլոգիաները, ամեն կերպ ջանում են հետ չմնալ:
Երեւանում նոյեմբերի 25-ին անցկացվել է Մերձսևծովյան երկրների ազգային լրատվականգործակալությունների ասոցիացիայի գլխավոր ասամբլեայի 7-րդ նիստը: Նիստին մասնակցելու նպատակով Հայաստան են ժամանել Ռուսաստանի, Վրաստանի, Ուկրաինայի, Ռումինիայի,Բուլղարիայի, Ալբանիայի ազգային լրատվական գործակալությունների գլխավոր տնօրենները,ինչպես նաեւ Թուրքիայի «Անադոլու» գործակալության միջազգային լրատվության բաժնիխմբագիրը: Համաժողովին հրավիրված են եղել նաեւ Կիպրոսի, Ղրղզստանի, Ղազախստանի,Բելառուսի լրատվական գործակալությունների տնօրենները: Երեւանյան հավաքի ընթացքում Կիպրոսը դարձավ ասոցիացիայի անդամ: Իսկ կառույցի մեկամյա նախագահությունը վստահվեց «Արմենպրես» լրատվական գործակալությանը:
Բաժանորդագրվեք մեր ալիքին Telegram-ում