Սիրիահայերի ուսման վարձի փոխհատուցման նպատակով հատկացվեց գրեթե 25 մլն դրամ
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի կառավարությունը պահուստային ֆոնդից ՀՀ սփյուռքի նախարարությանը հատկացրեց 24 մլն 660 հազար դրամ՝ ՀՀ բարձրագույն ուսումնական հաստատությունների սիրիահայ ուսանողներին 2014-2015 թվականների ուսումնական տարվա կրթաթոշակներ հատկացնելու նպատակով: «Արմենպրես»-ի հաղորդմամբ՝ ՀՀ սփյուռքի նախարար Հրանուշ Հակոբյանը նշեց, որ գումարը կտրամադրվի «Սիրիահայերի հիմնախնդիրները համակարգող կենտրոն» հասարակական կազմակերպությանը:
2014թ. հոկտեմբերի 15-ի դրությամբ հայաստանյան բուհերում և միջին մասնագիտական հաստատությունների բակալավրիատի ծրագրով սովորում են սիրիահայ 363 ուսանող, օրըստօրե այդ թիվն ավելանում է, ընդ որում՝ 25-30 սիրիահայ երիտասարդ սովորելու են մագիստրատուրայում:
Ըստ Հակոբյանի՝ սիրիահայերի ուսման վարձի փոխհատուցումն ամբողջությամբ կապահովվի Հայկական բարեգործական ընդհանուր միության և Գյուլբենկյան հիմնադրամի օժանդակությամբ:
Ուսման վարձավճարի լուծումն անհրաժեշտ է շարունակել, քանի որ խնդիրը մնում է որպես սիրիահայ ընտանիքների, երիտասարդների սոցիալական, թերևս, ամենահրատապ և շարունակական լուծում պահանջող հիմնահարցերից մեկը:
Բաժանորդագրվեք մեր ալիքին Telegram-ում