Իրաքի տարբեր շրջաններում ԻՊ-ի ավելի քան 50 անդամներ են սպանվել
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Իրաքի Հիթ քաղաքում նոյեմբերի 26-ին «Իսլամական պետության» տասնյակ անդամներ են սպանվել իրաքյան ռազմաօդային ուժերի հարվածների հետևանքով, ոչնչացվել են նրանց պատկանող զենքերով լի 5 մեքենաները: Ինչպես հաղորդում է «Արմենպրես»-ը՝ վկայակոչելով միջազգային լրատվամիջոցները, սպանված ահաբեկիչների թիվը գերազանցում է 20-ը: Եվս 9 ահաբեկիչներ սպանվել են Միկդադիայի հյուսիսում: Բեշմերգի ուժերը Քիրքուքի մարզում ԻՊ-ի 30 անդամներ են ոչնչացրել:
Բացի այդ, Սամրա քաղաքի բժշկական աղբյուրները տեղեկացրել են, որ 17 բնակիչ, այդ թվում` 3 կին, վիրավորվել է ԻՊ-ի հարձակման հետևանքով: Դիպուկահարը կրակ է բացել Սամրա քաղաքի ճանապարհով անցնող մեքենայի վրա:
Ավելի վաղ տեղեկություններ էին ստացվել, որ իրաքյան բանակը ԻՊ-ից մաքրել է ռազմավարական կարևոր նշանակություն ունեցող ճանապարհը Սարասիր և Ֆալուջա քաղաքների միջև:
«Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և, միևնույն ժամանակ, ամենահարուստ ահաբեկչական կազմակերպությունը, որը կարճ ժամանակում հսկայական տարածքներ է գրավել Սիրիայում և Իրաքում:
Բաժանորդագրվեք մեր ալիքին Telegram-ում