Արմեն Մուրադյանը ծանոթացել է մայրական մահացության դեպքերի վերլուծության արդյունքներին
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: ՀՀ առողջապահության նախարար Արմեն Մուրադյանի նախագահությամբ տեղի է ունեցել մայրական մահացության, մանկաբարձության և գինեկոլոգիայի խորհրդի հերթական նիստը։ Ինչպես «Արմենպրես»-ին տեղեկացրին ՀՀ առողջապահության նախարարությունից, Արմեն Մուրադյանը շեշտել է, որ մայրական մահացության դեպքերի վերլուծության նպատակը, անկախ իրավական և վարչական տույժերից, կազմակերպչական և բժշկական բացթողումների առկայության բացահայտումն է և առաջիկայում դրանց բացառումը։
Մանրամասն ներկայացվել են նախարարի հրամանով ստեղծված հանձնաժողովների կատարած ուսումնասիրությունների արդյունքները։ Խորհրդի անդամների լրացուցիչ հարցերն ուղղված են եղել ստեղծված իրավիճակների և իրականացված քայլերի առավել հստակ գնահատմանը։ Օրակարգում ընդգրկված դեպքերը մանրամասն վերլուծության են ենթարկվել։ Խորհրդի անդամներն ու նախարարության գլխավոր մասնագետները ներկայացրել են իրենց տեսակետները։ «Մայրական մահացությունն ամենից ցավոտ հարցն է, և պետք է ամեն ինչ անենք դրանք հնարավորինս կանխելու համար»,-ասել է նախարարը` ընդգծելով, որ բուժհիմնակներում թույլ տրված կազմակերպչական բացթողումների համար հավասարապես պատասխանատու են ինչպես հերթապահող կամ վարող բժիշկները, այնպես էլ բուժհաստատությունների ղեկավարները։
Արմեն Մուրադյանը հանձնարարել է շրջաբերականներ ուղարկել առաջնային օղակի մանկաբարձագինեկոլոգիական բոլոր կազմակերպություններին, որպեսզի խստորեն հետևեն հղիության վարման և ծննդալուծման գործող չափորոշիչներին։ Նախարարը միաժամանակ գլխավոր մանկաբարձ-գինեկոլոգ Ռազմիկ Աբրահամյանին հանձնարել է մասնագետների հետ քննարկել և առաջարկություններ ներկայացնել հղիության վարման գործող չափորոշիչներում փոփոխություններ կատարելու, մասնավորապես, հղիության միջին ժամկետում էլեկտրասրտագրություն ներառելու մասին։
Արմեն Մուրադյանն առաջնային օղակի և ծննդատների մասնագետներին խստորեն հանձնարարել է աշխատել համագործակցված, հղիներին այս կամ այն բուժհաստատություն ուղեգրելիս լիարժեք տեղեկատվություն տրամադրել, այնուհետև հետաքրքրվել նրանց հետագա վիճակով։ Նաև հանձնարարվել է Արմավիրի և Գավառի մարզերի հղիների մահվան դեպքերը ևս մեկ անգամ խորությամբ քննարկել առողջապահության վարչություններում` ուշադրության կենտրոնում պահելով բոլոր մանրամասներն ու հանգամանքները։ «Անրաժեշտ է նոր մոտեցումներ որդեգրել, օգտվել ընձեռված բոլոր հնարավորություններից, այդ թվում` հեռաբժշկությունից»,-ասել է նախարարը։
Արմեն Մուրադյանի հրամանով այսուհետև կքննարկվեն նաև կրիտիկական վիճակներից ծննդկանների դուրս բերման բոլոր դեպքերը։ Դրանց խորությամբ վերլուծությունն էական օժանդակություն կլինի ապագայում նման դեպքերի զարգացումը կանխելու և մայրական մահացության ցուցանիշները նվազեցնելու գործին։
Բաժանորդագրվեք մեր ալիքին Telegram-ում