ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Ազգային ժողովում մեկնարկել են «Հայաստանի Հանրապետության Եվրասիական տնտեսական միության մասին 2014թ. մայիսի 29-ի պայմանագրին միանալու վերաբերյալ» թեմայով խորհրդարանական լսումները:  Հիմնական զեկուցողներն են ՀՀ ֆինանսների փոխնախարար Սուրեն Կարայանը, ՀՀ էկոնոմիկայի նախարարի տեղակալ Էմիլ Տարասյանը և ՀՀ արտաքին գործերի նախարարի տեղակալ Շավարշ Քոչարյանը: «Հայաստանի Հանրապետության Եվրասիական տնտեսական միության մասին 2014թ. մայիսի 29-ի պայմանագրին միանալու վերաբերյալ» խորհրդարանական լսումները կազմակերպել են ՀՀ ԱԺ արտաքին հարաբերությունների և տնտեսական հարցերի մշտական հանձնաժողովները:

Լսումների մեկնարկին ՀՀ արտաքին հարաբերությունների մշտական հըանձնաժողովի նախագահ Արտակ Զաքարյանը հիշեցրեց, որ Հայաստանը ԵՏՄ անդամակցության գործընթացին միացել է ՀՀ Նախագահ Սերժ Սարգսյանի՝ 2013թ. սեպտեմբերի 3-ին Մոսկվայում արած հայտարարությունից հետո, իսկ հոկտեմբերի 10-ին ՀՀ Նախագահը ստորագրել է ԵՏՄ-ին Հայաստանի անդամակցության պայմանագիրը: «Քանի որ թեման ակտուալ է, մենք որոշել ենք հրավիրել խորհրդարանական լսումներ, որոնց ժամանակ, հարգելի մասնակիցներ, դուք կստանաք ձեզ հուզող հարցերի պատասխանները»,- «Արմենպրես»-ի հաղորդմամբ՝ նշեց Զաքարյանը՝ տեղեկացնելով, որ զեկուցողներից յուրաքանչյուրին զեկուցման համար կտրվի 20 րոպե ժամանակ, որից հետո արդեն լսումների մասնակիցները հնարավորություն կունենան հարցեր ուղղել  հիմնական զեկուցողներին:

Եվրասիական տնտեսական միության մասին պայմանագրին Հայաստանի անդամակցության պայմանագիրը ՀՀ Նախագահ Սերժ Սարգսյանը ստորագրել է հոկտեմբերի 10-ին Մինսկում: Նոյեմբերի 17-ին ՀՀ Սահմանադրական դատարանը տվել է եզրակացություն ԵՏՄ-ին Հայաստանի անդամակցության պայմանագրի՝ ՀՀ Սահմանադրությանը համապատասխանելու վերաբերյալ: