ԳՅՈՒՄՐԻ, 22 ՆՈՅԵՄԲԵՐԻ, ԱՐՄԵՆՊՐԵՍ: ՀՀ ֆուտբոլի բարձրագույն խմբի առաջնության մրցաշարային աղյուսակում «Շիրակ»-ը զբաղեցնում է  երրորդ հորիզոնականը: Այս ցուցանիշը չի գոհացնում թե՛ ակումբի երկրպագուներին և թե՛ ղեկավարությանը:   Թեև ակումբն այս տարի իրեն չի հասցերել դրսևորել այնպես, որ արդարանցնի երկրպագուներին, բայց ակումբի նախագահ Արման Սահակյանն «Արմենպրես»-ին վստահեցրեց, որ թիմը դեռ իրենը կասի: «Դեռ սկիզբն է, բայց, անշուշտ,  մենք ավելի մեծ սպասումներ ունեինք:  Դեռ ժամանակ կա վերականգնելու այդ սպասումները: Այս պահին առաջնությունում երրորդ տեղում ենք, որը մեզ չի բավարարում: Կարծում եմ, մեր ներուժն ավելին է, փորձենք մեր դիրքերը բարելավվել ձմեռային արձակուրդներից հետո»,-նշեց Արման Սահակյանը:

Խոսելով ոչ այնքան բարձր ցուցանիշների մասին՝ ակումբի նախագահը նշեց, որ պատճառը ակումբի որոշ ֆուտբոլիստների այլ ակումբներ տեղափոխվելն է: «Շատ ֆուտբոլիստներ մեր մոտից գնացին տարբեր բարձր առաջնություններ:   6-7 առանցքային ֆուտբոլիստ է գնացել, դրա պատճառով մի քիչ թուլացել ենք, դա բնական է, բայց մյուսները պետք է իրենց մեջ ուժ գտնեն, որպեսզի լրացնեն մյուսների տեղը»,-ավելացրեց Արման Սահակյանը:

ՀՀ Ֆուտբոլի բարձրագույն խմբի առաջնությունում «Շիրակ» ֆուտբոլային ակումբը նոյեմբերի 22-ին «Հանրապետական» մարզադաշտում հանդիպում է անցկացնում  Ուլիսի հետ:

Արմենուհի Մխոյան