Մատս Հյումելսը չի պատրաստվում լքել «Բորուսիա»-ն
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Դորտմունդի «Բորուսիա»-ի և Գերմանիայի ազգային թիմի պաշտպան Մատս Հյումելսն անդրադարձել է այն լուրերին, որ ինքն առաջիկայում պատրաստվում է փոխել ակումբը: «Լուրերն այն մասին, թե ես լքելու եմ «Բորուսիա»-ն, հաճախակի են տարածվում: Սակայն ես աշխատում եմ ուշադրություն չդարձնել նրանց վրա: Հիմա ես չեմ մտածում ակումբը փոխելու մասին: Իմ խնդիրն այժմ նրանում է, որ ինչքան հնարավոր է շուտ վերադառնամ մեկնարկային կազմ և օգնեմ թիմին կարգավորելու մրցաշարային աղյուսակում ստեղծված խնդիրը: Մենք դեռ ժամանակ ունենք ինչ-որ բան փոխելու համար»,-«Արմենպրես»-ի հաղորդմամբ` Հյումելսի խոսքերը մեջբերում են գերմանական ԶԼՄ-ները:
Վերջին շրջանում անգլիական «Մանչեստեր Յունայթեդ»-ը հետաքրքվել էր Հյումելսի ծառայություններով: Իսկ Բունդեսլիգայում «Բորուսիա»-ն այժմ 15-րդ տեղում է 10 միավորով:
Բաժանորդագրվեք մեր ալիքին Telegram-ում