Սիրահայ գրողների գործերում արտահայտվում են վերջին շրջանի պատերազմական դեպքերը
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Սիրիայում վերջին շրջանում տեղի ունեցող իրադարձությունները մեծ ազդեցություն թողեցին սիրիահայ ստեղծագործողների վրա: Ստեղծվեցին դեպքերը ներկայացնող գործեր՝ բանաստեղծություններ, պատմվածքներ, այլ ստեղծագործություններ, որոնք արտահայտում են սիրիահայ ժողովրդի ցավը: Նոյեմբերի 5 -ին Հայաստանի գրողների միությունում տեղի ունեցավ հանդիպում սիրիահայ գրողների հետ, քննարկվեցին նրանց հուզող տարբեր հարցեր:
Բանաստեղծ, արձակագիր Մարուշ Երամյանը Հայաստան է եկել Հալեպից: Փաստում է, որ արդեն չորս ամիս մեր երկրում է:
«1996-ից թվականից հաճախ էի գալիս այստեղ: Շատ հետաքրքիր կացության մեջ ենք հայտնվել, երբ Հալեպում էինք. բոլորս աշխատում էինք, և մեզ համար գրականությունն արտաաշխատանքային երևույթ էր. մասնագետ գրողներ չէինք, հիմա եկել ենք այստեղ, անգործ ենք, և գրելու շատ ժամանակ ունենք: Այսօր Հայաստանում մարդը գրականությամբ չի կարող ապրել»,- «Արմենպրես»-ի փոխանցմամբ՝ նշեց բանաստեղծը:
Մարուշ Երամյանի խոսքով՝ վերջին շրջանի դեպքերն արդեն վաղուց են արտահայտվել սիրիահայ գրականության մեջ: «Գրեթե բոլորս պատերազմի մասին ենք գրում: Արձակի և բանաստեղծության միջոցով անդրադառնում ենք այս դեպքերին: Շատերս այդ ծանր օրերին նվիրված գործեր ունենք»,- նկատեց նա:
Սիրիահայ գրողների համախմբման անդամ, գրող Հակոբ Միքայելյանն էլ է Հալեպից Հայաստան եկել: Արդեն հինգ ամիս մեր երկրում է:
«Հայաստան շատ եմ եկել և գնացել, սակայն, երկար մնալով, հասկացա, որ գրելու առումով պեղելիք շատ կա: Սիրիան էլ հայրենիք է մեզ համար, Հայաստանն էլ: Սիրիան ավելի շոշափելի էր, իսկ սա էլ մեր հոգևոր հայրենիքն է. մենք պետք է աշխատենք դառնալ Հայաստանի քաղաքացիներ»,- համոզված է գրողը:
Հակոբ Միքայելյանի խոսքով՝ ինքն ամեն շաբաթ թերթերում հոդվածներ է գրում , կամաց-կամաց հարմարվում հայրենիքում:
Բաժանորդագրվեք մեր ալիքին Telegram-ում