«Զվարթնոց»-ում բացվել է Թորոս Թորամանյանի 150-ամյակին նվիրված ցուցահանդես
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: «Զվարթնոց» պատմամշակութային արգելոց-թանգարանում հոկտեմբերի 30-ին բացվել է անվանի ճարտարապետ, հայ ճարտարապետության գիտական պատմության հիմնադիր Թորոս Թորամանյանի ծննդյան 150-ամյակին նվիրված ցուցահանդես: Ինչպես «Արմենպրես»-ին տեղեկացրին «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ից, ցուցահանդեսին ներկայացվել են Անիում և Հայաստանի այլ շրջաններում կատարված չափագրություններ, գիտական աշխատություններ հայ ճարտարապետության վերաբերյալ, պատմական հուշարձաններին նվիրված ուսումնասիրություններ, անվանի ճարտարապետի նամակները, Ավետիք Իսահակյանի և այլոց հիշողությունները Թորոս Թորամանյանի մասին, լուսանկարներ, պարբերականներ, Վիեննայի համալսարանի արվեստաբանության ամբիոնի վարիչ, պրոֆեսոր Յոզեֆ Ստրժիգովսկու «Հայերի ճարտարապետությունը և Եվրոպան» աշխատության կրկնօրինակը, ՊՈԱԿ-ի կողմից վերջին տարիներին հրատարակված Թորոս Թորամանյանի արխիվային նյութերի մատենաշարի չորս պրակները:
Ցուցադրվել են նաև Թորոս Թորամանյանի` Անիում կատարած լուսանկարները (ընդհանուր առմամբ 70-ից ավելի նյութ): Ցուցահանդեսը կգործի մեկ ամիս:
Բաժանորդագրվեք մեր ալիքին Telegram-ում