Եվրահանձնակատարը հուսախաբվել է Ադրբեջանում
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Ես հուսախաբված եմ այն տեղեկություններով, որ ադրբեջանական դատարանները երկարացրել են իրավապաշտպաններ Լեյլա Յունուսի եւ Ինթիգամ Ալիեւի կալանման ժամկետները: Այս մասին, ինչպես հաղորդում է «Արմենպրես»-ը` վկայակոչելով ադրբեջանական «Թուրան» լրատվական գործակալությունը, հայտարարել է Եվրոպայի Խորհրդի մարդու իրավունքների հանձնակատար Նիլս Մուժնիեկսը` մեկնաբանելով իր Բաքու կատարած այցի արդյունքները:
«Այդ բոլոր թեմաները ես քննարկել եմ Ադրբեջանի գլխավոր դատախազ Գարալովի եւ արդարադատության նախարար Մամեդովի հետ, ընդգծել Լեյլա Յունուսին ազատ արձակելու անհրաժեշտությունը` հաշվի առնելով վատ առողջական վիճակը, սակայն, ամեն ինչ հակառակը կատարվեց», -ասել է եվրահանձնակատարը:
Նիլս Մուժնիեկսը նշել է, որ Ադրբեջանի պաշտոնական անձանց հետ բանակցությունների ընթացքում խոսել է իրավական ասպեկտների մասին, իրավապաշտպաններին կալանքի տակ պահելու չհիմնավորված լինելու եւ Մարդու իրավունքների եվրոպական դատարանի` Ադրբեջանի գծով որոշումների ու դրանց ի կատար ածելու անհրաժեշտության մասին:
Բաժանորդագրվեք մեր ալիքին Telegram-ում