ԱՐՏԱՇԱՏ, 24 ՀՈԿՏԵՄԲԵՐԻ, ԱՐՄԵՆՊՐԵՍ:  Արարատի մարզպետ Ռուբիկ Աբրահամյանը մարզպետի տեղակալ Աշոտ Մուրադյանի եւ մարզպետարանի աշխատակազմի տրանսպորտի եւ ճանապարհաշինության բաժնի պետ Արայիկ Պողոսյանի ուղեկցությամբ այցելեց Ազատավան համայնք` ընթացող ասֆալտապատման աշխատանքներին  ծանոթանալու նպատակով:

Մարզի ղեկավարն ընթացող աշխատանքներն ուսումնասիրելուց եւ դիտելուց հետո հետաքրքրվեց ջրահեռացման ցանցի շինարարական աշխատանքներով: Նա կարեւորեց ջրահեռացման ցանցի կառուցումն` ասելով, որ կենտրոնական այս ճանապարհով եղանակի փոփոխման ժամանակ անցնել հնարավոր չէ, որովհետեւ անձրեւաջրերը փակում են հետիոտնի ճանապարհը, ինչպես նաեւ խանգարում են երթեւեկությանը` դառնալով բազմաթիվ վթարների պատճառ: Նա հետաքրքրվեց նաեւ դպրոց տանող ճանապարհի վիճակով, ինչպես նաեւ մանկապարտեզով:

«Արմենպրես»-ի փոխանցմամբ` գյուղապետ Սարգիս Խաչատրյանն ասաց, որ գյուղի մանկապարտեզի համար արդեն ձեռք է բերված համապատասխան կառույցը,  որի հիմնանորագման աշխատանքները կսկսվեն գարնանը, եւ այլեւս Ազատավանի երեխաները ստիպված չեն լինի այցելել հարեւան գյուղի մանկապարտեզը:

Հ-8 Երեւան- Վերին Արտաշատ-Այգավան հանարպետական նշանակության ավտոճանապարհի Ազատավան-Արտաշատ ճանապարհահատվածի 1,5 կմ ճանապարհի ասֆալտապատման աշխատանքները կավարտվեն այս տարի, մնացյալ 2 կմ-ինը` 2015 թվականին: Վերոհիշյալ հատվածի ասֆալտապատման աշխատանքների համար պետբյուջեից հատկացվել է 105 մլն դրամ: Շինարարական աշխատանքները կավարտվեն նոյեմբերի վերջին: Այն իրականացնում է «Տեր-Հայրապետյանշին» ՍՊԸ-ն: 

Հանդիպումը շարունակվեց գյուղապետարանում: Մարզի ղեկավարը հետաքրքրվեց բնակիչների հոգսերով: Խոսվեց ոռոգման ջրի մասին: Մարզպետը հավաստիացրեց, որ շուտով կկարգավորվի նաեւ այդ խնդիրը` համապատասխան միջոցներ ձեռնարկելուց հետո:

Լիլիթ Մաճկալյան