ՀՀ ԱԳ նախարարը միջազգային հանրությունը հորդորում է վճռականությամբ պայքարել ահաբեկչության դեմ
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ԱԳ նախարար Էդվարդ Նալբանդյանի գնահատմամբ, նրանք, ովքեր սատարում են ահաբեկչությունն ու ահաբեկիչներին օգտագործում որպես գործիք այս կամ այն նպատակով, իրենք կարող են հայտնվել թիրախում: «Արմենպրես»-ի հարցին ի պատասխան, թե, այսպես կոչված, «Իսլամական պետություն» ծայրահեղական խմբավորման գործողություններն ինչ հետեւանքներ կարող են ունենալ, Նալբանդյանն ասաց, որ ահաբեկչությունը կարող է վերածվել անկառավարելի բումերանգի, եւ ահաբեկիչների կողմից գործողությունները եւս մեկ անգամ ընդգծում են հրատապությունը, որ միջազգային հանրությունը պետք է միավորի ջանքերն ու վճռականությամբ պայքարի ահաբեկչության դեմ:
«Հայտնի է, որ արցախյան պատերազմի ընթացքում Ադրբեջանն օգտագործում էր բազմաթիվ վարձկանների, որոնք սերտ կապեր ունեին ահաբեկչական միջազգային հայտնի կառույցների հետ: Այսօր Ադրբեջանում պայքարում են ծայրահեղականների դեմ իրենց երկրում. չէի մեկնաբանի այդ պայքարի արդյունավետության կամ անկեղծության մակարդակը: Մեկ բան ակնհայտ է, որ բազմաթիվ գրոհայիններ մասնակցում են, այսպես կոչված, «Իսլամական պետություն» խմբավորման գործողություններին: Երեկ լրատվամիջոցները, այդ թվում` ադրբեջանական, հայտնեցին, ռազմական գործողությունների ժամանակ սպանվել է ազգությամբ ադրբեջանցի Խալեդ Ազերին, ով Արցախյան պատերազմում ղեկավարում էր տխրահռչակ պարտիզանական խումբը»,- ՀՀ ԱԳՆ-ում Լիտվայի արտաքին գործերի նախարար Լինաս Լինկյավիչուսի հետ հրավիրած ասուլիսի ժամանակ ընդգծեց Էդվարդ Նալբանդյանը:
Լինաս Լինկյավիչուսն էլ շեշտեց, որ ակնհայտ է, որ իսլամական խմբավորումը որեւէ առնչություն չունի իսլամական կրոնի հետ: Լիտվացի նախարարն կարեւորեց միջազգային կազմակերպությունների կողմից համակարգված դիրքորոշում մշակելու անհրաժեշտությունը:
Բաժանորդագրվեք մեր ալիքին Telegram-ում