Եթե դուք լրտեսների հետ շատ եք շփվում, դա ձեր խնդիրն է. Շարմազանովը պատասխանեց Զուրաբյանին
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովում «Սահմանամերձ գյուղերում գործունեության ծավալումը հարկերից ազատելու մասին» օրենքի նախագծի և հարակից նախագծերի օրենսդրական փաթեթի քննարկման ժամանակ ՀԱԿ խմբակցության անունից ելույթ ունեցավ խմբակցության ղեկավար Լևոն Զուրաբյանը, ով քննադատեց օրենքի նախագիծը և մեծամասնությանը մեղադրեց ընդդիմության կողմից 44 ստորագրությամբ արտահերթ նիստ հրավիրելու նախաձեռնությունը միտումնավոր տապալելու մեջ:
ՀԱԿ խմբակցության ղեկավարի ելույթին հաջորդեց ԲՀԿ խմբակցության պատգամավոր Միքայել Մելքումյանի ելույթը: Նիստը վարող ՀՀ ԱԺ փոխնախագահ Էդուարդ Շարմազանովը հայտարարեց, որ ամբիոնին է մոտենում այլընտրանքի՝ ԲՀԿ-ի ներկայացուցիչ Միքայել Մելքումյանը: «Ի դեպ, որ ասում եք` ընդդիմությունը 44 ստորագրություն հավաքեց, եթե այլընտրանքը չլիներ, ո՞նց էիք 44 ստորագրություն հաքվաքելու: Այս մարդիկ դեռևս ընդդդիմություն չեն՝ այլընտրանք են, և չեն էլ ցանկանում ընդդիմություն դառնալ, որքան որ ես գիտեմ»,- «Արմենպրես»-ի հաղորդմամբ՝ նշեց Շարմազանովը:
ԱԺ փոխնախագահն արձագանքեց նաև Զուրաբյանի այն դիտարկմանը, թե կառավարությունը խորհրդարանում իր «լրտեսների» միջոցով հարցեր է լուծում, իսկ իշխանությունները վախեցած են ընդդիմության համախմբումից և այն շարժումից, որ իրենք սկսել են: «Ես մեր բոլոր գործընկերներին հորդորում եմ պահպանել խորհրդարանական բառապաշարը: Խորհրդարանում լրտեսներ չկան: Եթե դուք շատ եք լրտեսների հետ շփվել, դա ձեր խնդիրն է, սակայն պետք է պահպանեք էթիկայի տարրական կանոնները ձեր գործընկերների նկատմամբ, ում հետ ամեն օր աշխատում և շփվում եք: Ինչ վերաբերում է վախեցած լինելուն՝ հա, վախեցած ենք, բա ինչ ենք. մեր դեմքերից երևում է, որ վախեցած ենք»,- հեգնեց Շարմազանովը:
Բաժանորդագրվեք մեր ալիքին Telegram-ում