Էբոլա վիրուսի դեմ պայքարին միացել են նաև օլիմպիականները
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Օլիմպիականների համաշխարհային միությունը (WOA) Արևմտյան Աֆրիկայի Սիերա Լեոնե պետությունում և այդ շրջանի այլ երկրներում սկսել է Էբոլա վիրուսի դեմ պայքարի յուրատեսակ գործընթաց:
Նշած միության անդամ են ավելի քան 100 հազար մարզիկներ: Ստեղծվել է հատուկ աշխատանքային խումբ, որը գլխավորում է հեղինակավոր բժիշկ, Սիերա Լեոնեի մարզական պատվիրակության կազմում երկու օլիմպիական խաղերի մասնակից Ֆրենսիս Լավ Էդվինը:
Մոլորակի ամենաարագ մարդը` ճամայկացի արագավազորդ Հուսեին Բոլտը բարեգործական վաճառքի է դրել իր ստորագրությամբ մարզակոշիկները: Եկամուտը կհանձնվի էբոլայի վիրուսի դեմ հիմնադրամին: Գործընթացին միացել են նաև ԽՍՀՄ անվանի ձողացատկորդ, ուկրաինացի Սերգեյ Բուբկան, ամերկացի ճանաչված արագավազորդ Կարլ Լյուիսը, ճապոնացի մրճանետորդ Կոձի Մուրոֆուշին և փառաբանված այլ չեմպիոններ: «Արմենպրես»-ի հաղորդմամբ, այս մասին տեղեկացնում է Միջազգային օլիմպիական կոմիտեն:
Առողջապահության համաշխարհային կազմակերպության տվյալներով՝ անցյալ տարվա դեկտեմբերին Գվինեայում հիվանդության բռնկման պահից սուր վիրուսային ինֆեկցիայի զոհ Է դարձել 4555 մարդ, վարակված են 9216-ը: Գործնականում մահվան եւ վարակման բոլոր դեպքերը բաժին են ընկնում արեւմտաաֆրիկյան երեք երկրների՝ Գվինեային, Լիբերիային եւ Սիերա Լեոնեին: ԱՄՆ-ում երեք մարդ Է վարակվել վիրուսով, նրանցից մեկը մահացել Է, Իսպանիայում վիրուսը հայտնաբերվել Է միայն մեկ մարդու մոտ: Նիգերիայում գրանցվել Է մահվան ութ եւ վարակման քսան դեպք, իսկ Սենագալում հիվանդացել Է մեկ մարդ: Վերջին երկու երկրներում հիվանդության բռնկումը վերջնականապես ավարտված Է հայտարարվել:
Բաժանորդագրվեք մեր ալիքին Telegram-ում