Կառավարությունը դեմ է շրջանառության հարկի մասին օրենքում փոփոխություններ կատարելու «քառյակի» փաթեթին
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը դեմ է Ազգային ժողովի «Բարգավաճ Հայաստան», «Ժառանգություն», «ՀՅԴ» և «Հայ ազգային կոնգրես» խմբակցությունների պարգամավորներ Միքյալել Մելքումյանի, Արծվիկ Մինասյանի, Թևան Պողոսյանի և Գագիկ Ջհանգիրյանի՝ «Շրջանառության հարկի մասին» ՀՀ օրենքում փոփոխություններ և լրացումներ կատարելու մասին» և «ՀՀ-ում ստուգումների կազմակերպման և անցկացման մասին» ՀՀ օրենքում լրացում կատարելու մասին» ՀՀ օրենքների նախագծերին:
Ինչպես կառավարության նիստում նշեց ՀՀ ֆինանսների նախարար Գագիկ Խաչատրյանը՝ պատգամավորներն առաջարկում են շրջանառության հարկ վճարող համարվելու շեմը 58.35 մլն ՀՀ դրամից բարձրացնել մինչև 150 մլն, սահմանել, որ մինչև 2016 թվականի հունվարի 1-ն առևտրական (առք ու վաճառքի) գործունեության մասով հարկ վճարողն իրավունք ունի ընտրել հարկի 3.5 տոկոս դրույքաչափի համակարգը և ազատվել ձեռքբերումները փաստաթղթավորելու օրենսդրական պահանջից կամ ընտրել հարկի 1 տոկոս դրույքաչափի համակարգը` պարտավորվելով պահպանել ձեռքբերումները փաստաթղթավորելու օրենսդրական պահանջը:
Նախագծով առաջարկվում է շրջանառության հարկի շեմը բարձրացնել ոչ միայն առևտրական (առք ու վաճառքի) գործունեության մասով, այլ գործունեության բոլոր տեսակների մասով առհասարակ: Ընդ որում, առաջարկվում է շեմը բարձրացնել` անկախ այն հանգամանքից, թե առևտրական (առք ու վաճառքի) գործունեությամբ զբաղվող հարկ վճարողը հարկման որ կարգն է ընտրում` հարկի 3.5 տոկոս դրույքաչափ` ազատվելով ձեռքբերումները փաստաթղթավորելու օրենսդրական պահանջից, թե հարկի 1 տոկոս դրույքաչափ` պարտավորվելով պահպանել ձեռքբերումները փաստաթղթավորելու օրենսդրական պահանջը:
Գագիկ Խաչատրյանը նշեց, որ առաջարկության ընդունման դեպքում ավելի կխորանա առանց այդ էլ լայնորեն տարածված` արտադրողներից ու ներմուծողներից կատարվող ձեռքբերումների դիմաց դուրս գրվող հաշվարկային փաստաթղթերից հրաժարվելու խնդիրը: «Մասնավորապես, եթե ներկայումս այդ խնդիրն առկա է առավելապես այն հարկ վճարողների մոտ, որոնք մոտ են գտնվում շրջանառության հարկի գործող` 58.35 մլն դրամ շեմին և հաշվարկային փաստաթղթերից հրաժարվում են իրենց հետագա իրացումները նվազեցնելու ակնկալիքով, ապա շրջանառության հարկի շեմի բարձրացման պարագայում այդպիսի վարքագիծ են սկսելու դրսևորել արդեն նոր` ավելի բարձր շեմին մոտ գտնվող ու մի քանի անգամ ավելի խոշոր տնտեսավարող սուբյեկտները: Ընդ որում, այն հանգամանքը, որ առևտրական գործունեությամբ զբաղվող հարկ վճարողներն այդպիսի վարքագիծ ունեն, հաստատվում է նաև նախագծի ընդունման հիմնավորմամբ: Մասնավորապես նշվում է, որ որոշ գնահատումներով շրջանառության իրական ծավալները հայտարարագրվող ծավալները գերազանցում են 5-6, իսկ երբեմն էլ` 10-12 անգամ, նախագծի ընդունման հիմնավորմամբ արտադրողներից ու ներմուծողներից կատարվող ձեռքբերումների դիմաց դուրս գրվող հաշվարկային փաստաթղթերից հրաժարվելու հանգամանքը մեկնաբանվում է այլ տեսանկյունից և նշվում է, որ շրջանառության հարկի շեմի բարձրացման պարագայում ներկայումս շեմին մոտ գտնվող հարկ վճարողները կսկսեն հայտարարագրել իրենց իրացման շրջանառությունները, ինչի արդյունքում լրացուցիչ հարկվող օբյեկտներ կառաջանան»,-«Արմենպրես»-ի հաղորդմամբ՝ նշեց Գագիկ Խաչատրյանը:
Նրա խոսքով, նշյալ եզրահանգումը կատարելիս, սակայն, հաշվի չի առնվել այն կարևոր հանգամանքը, որ շրջանառության հարկի շեմի բարձրացման պարագայում ներկայում ԱԱՀ վճարող համարվող շուրջ 9400 հարկ վճարողներից շուրջ 7000 հարկ վճարողներ կտեղափոխվեն շրջանառության հարկի համակարգ: Հետևաբար, հաշվի առնելով նաև այն հանգամանքը, որ շրջանառության հարկի համակարգը` որպես իրապես փոքր և միջին ձեռնարկատիրության սուբյեկտների համար նախատեսված հարկման համակարգ, ենթադրում է ավելի ցածր հարկային բեռի սահմանում, քան հարկման ընդհանուր համակարգում առաջացող հարկային բեռն է, ստացվում է, որ նախագծի ընդունումը ոչ թե դրական, այլ խիստ բացասական ազդեցություն կունենա պետական բյուջեի հարկային եկամուտների վրա:
«Մասնավորապես, մեր կողմից կատարված հաշվարկների համաձայն, նախագծի ընդունումը պետական բյուջեի հարկային եկամուտները կկրճատի տարեկան շուրջ 39 մլրդ դրամով, շրջանառության հարկի շեմը շուրջ 3 անգամ բարձրացնելու պարագայում կտրուկ կընդլայնվեն խոշոր տնտեսավարող սուբյեկտների` արհեստականորեն տրոհվելու և շրջանառության հարկի համակարգից անհարկի ձևով օգտվելու հնարավորությունները: Մասնավորապես, եթե ներկայումս, օրինակ, տարեկան կտրվածքով 300 մլն դրամ շրջանառություն ունեցող տնտեսավարող սուբյեկտի տրոհվելու հնարավորությունները գործնականում շատ սահմանափակ են, քանի որ օգտվելու համար շրջանառության հարկի համակարգից այդ տնտեսավարող սուբյեկտը պետք է բաժանվի 5-6 տնտեսավարող սուբյեկտների, ապա առաջարկության ընդունման պարագայում բավարար կլինի պարզապես այդ տնտեսավարող սուբյեկտը 2 առանձին տնտեսավարող սուբյեկտների բաժանելը»,- նկատեց ՀՀ ֆինանսների նախարարը:
Ելնելով պարզաբանումներից, կառավարությունը դեմ է պատգամավորների առաջարկին: Ֆինանսների նախարարը նշեց, որ իրենք շարունակում են աշխատել պատգամավորների հետ:
Բաժանորդագրվեք մեր ալիքին Telegram-ում