ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության վարչապետ Հովիկ Աբրահամյանը նորմալ է համարում պատգամավորների գործունեության վերաբերյալ ամիսը մեկ անգամ հաշվետվություն ներկայացնելու առաջարկը, սակայն գտնում է, որ այդ հարցը պետք է որոշի խորհրդարանը: ՀՀ կառավարությունը դեմ արտահայտվեց «Ժառանգություն» խմբակցության պատգամավոր Զարուհի Փոստանջյանի ներկայացրած «Ազգային ժողովի կանոնակարգ» Հայաստանի Հանրա­պե­տու­թյան օրենքում լրացում կատարելու մա­սին» Հայաստանի Հան­րապետության օրենքի նա­խա­գծին, որով առաջարկվում է, որ պատգամավորներն ամեն ամիս հանդես գան հաշվետվությամբ:  

«Իմ կարծիքով, այս հարցը պետք է տեղափոխենք խորհրդարան, որպեսզի  իրենք քննարկեն և միգուցե ողջամիտ նոր ձևակերպումներով փորձեն այս հարցին տալ լուծում: Մենք կոմիտեի նիստերում քննարկեցինք հարցը տիկին Փոստանջյանի հետ՝  կարծես մտադիր էր, որ նախագծում ձևակերպումները մի փոքր ավելի հարմարեցվեն: Ոճը, ձևը նորմալ է, թող պատգամավորները հաշվետվություններ ներկայացնեն: Այսինքն` ես առաջարկում եմ, որ խորհրդարանը որոշի»,- «Արմենպրես»-ի հաղորդմամբ՝ նշեց վարչապետը:

Հովիկ Աբրահամյանը հանձնարարեց ՀՀ արդարադատության նախարար Հովհաննես Մանուկյանին՝ արձանագրել նախագծում խնդիրները և ներկայացնել Ազգային ժողով: