ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ։ Արարատի մարզի Ուրցաձոր գյուղի հարակից տարածքում՝ Կովկասի կենսաբազմազանության ապաստարանում, մշտադիտարկման նոր սերնդի IP և GPS տեսախցիկներ են տեղակայվել։ Կովկասի կենսաբազմազանության ապաստարանի պահպանվող տարածքում դրանց տեղակայման արարողությունը տեղի ունեցավ հոկտեմբերի 22-ին: Կովկասի կենսաբազմազանության ապաստարանի համակարգող Մանուկ Մանուկյանը ներկայացրեց նոր սերնդի տեսախցիկների առավելությունը։ «IP տեսախցիկները շարունակական ուղիղ տեսահոսք են ապահովում անտառապահների կայանում միացրած համակարգիչներին, իսկ GPS տեսախցիկները առավելությունը կայանում է նրանում, որ նրանք սկսում են աշխատել շարժումը արձանագրելուն պես 5 վայրկյանի ընթացքում և այդ տեսախցիկի տրամադրած տեղեկատվությունն ու նկարներն անմիջապես փոխանցվում են SMS-հաղորդագրությամբ կամ էլեկտրոնային փոստի հասցեին»,- «Արմենպրես»-ի հաղորդմամբ՝ լրագրողների հետ զրույցում ասաց Կովկասի կենսաբազմազանության ապաստարանի համակարգող Մանուկ Մանուկյանը և հավելեց, որ ստեղծված համակարգը նաև որսագողության դեմ պայքարի արդյունավետ միջոց է Կովկասի կենսաբազմազանության ապաստարանի պահպանվող տարածքում։

Սարքերը տրամադրած ընկերության` Վիվասել-ՄՏՍ-ի գլխավոր տնօրեն Ռալֆ Յիրիկյանը նշեց, որ, անշուշտ, նոր սերնդի GPS տեսախցիկների տեղադրած տեսանելի արդյունքները կերևան ապագայում։ «Մենք պետք է տեսնենք, թե ինչ կտեսագրեն այս տեսախցիկները հետագայում և կարծում եմ, որ չպետք է բավարարվենք ձեռք բերածով ու նոր տեխնոլոգիաների ի հայտ գալուն պես՝ պետք է փորձենք ներդնել դրանք»,- ասաց նա և հավելեց, որ GPS տեսախցիկները կօգնեն այցելու-գիտնականներին «Խոսրովի անտառ պետական արգելոց»-ին հարակից տարածքում հետազոտություններ կատարելուն։

Վայրի բնության և մշակութային արժեքների պահպանման հիմնադրամի (FPWC) հայաստանյան մասնաճյուղի տնօրեն Կարեն Մանվելյանը շնորհակալություն հայտնեց Վիվասել-ՄՏՍ ընկերությանն աջակցության համար և ծանոթացրեց ներկաներին Կովկասի կենսաբազմազանության ապաստարան ծրագրի շրջանակում ձեռք բերված անօդաչու տեսահսկման համակարգին։ «Տեսահսկման գերժամանակակից համակարգերը մեզ հնարավորություն են ընձեռում մշտադիտարկում իրականացնել հեռավոր և դժվարամատչելի վայրերում՝ կենդանական աշխարհի մասին ապահովելով անհրաժեշտ տեղեկատվություն»,- ասաց նա և հավելեց, որ առաջին անգամ Հայաստանում տեսահսկման համակարգերի միջոցով կենդանիների վերաբերյալ տեղեկությունների ստացումը հնարավոր դարձավ Վիվասել-ՄՏՍ ընկերության աջակցության շնորհիվ։

 2014թ. հուլիսի վերջին ՎիվաՍել-ՄՏՍ-ը «Խոսրովի անտառ պետական արգելոց»-ին հարակից առաջին մասնավոր կառավարվող «Կովկասյան կենսաբազմազանության ապաստարան» կոչվող պահպանվող տարածքում  հիմնական կայան էր տեղադրել: Հիմնական կայանը գտնվում է ծովի մակարդակից 1300 մ բարձրություն ունեցող լեռան վրա: Արտաքին էլեկտրասնուցման համար տեղադրվել էր տրանսֆորմատորային ենթակայան ու փայտե սյուների վրայով անցկացվել է 1,5 կմ երկարությամբ բարձր լարման հոսանքագիծ, որը լեռան գագաթին գտնվող հիմնական կայանը միացնում է ստորոտից որոշակի հեռավորության վրա գտնվող էլեկտրական հոսանքի հիմնական աղբյուրին: